ఈ కాంచనలు ఆపవా లారెన్స్

ఇవాళ నాని జెర్సితో పాటు లారెన్స్ కాంచన 3 కూడా థియేటర్లలో అడుగుపెట్టింది. టాక్ రిపోర్ట్స్ అన్ని బయటికి రావడానికి ఇంకొన్ని గంటలు పడుతుంది కానీ తమిళనాడుతో పాటు ఓవర్సీస్ లో ప్రీమియర్ షోలు పూర్తయిపోయాయి. వాటి సారాంశం ఇంకా రావాల్సి ఉంది కానీ ఎండ్ టైటిల్స్ లో లారెన్స్ అన్నట్టుగానే కాంచన 4 వస్తుందని వేశాడు. అంతేకాదు మరోసైడ్ ముని 5 అని కూడా ఇవ్వడం కొసమెరుపు.

ప్రీ రిలీజ్ ప్రమోషన్ లో కాంచన పది భాగాలు తీసినా ప్రేక్షకులు ఆదరిస్తారు అని లారెన్స్ చెప్పిన మాట యధాలాపంగా కాదు. నిజంగానే అన్నంత పని చేసేలా ఉన్నాడు. మునితో కలుపుకుంటే హారర్ కామెడీ జానర్ లో లారెన్స్ ఇప్పటిదాకా నాలుగు సినిమాలు వదిలాడు. ఇంకొక్క ఆరు తీయడం పెద్ద పనేమీ కాదు. కథలో చిన్నమార్పులు తప్ప కామెడీ అదే ఉంటుంది కాబట్టి ఈజీగా లాగించవచ్చు

నిజానికి లారెన్స్ లాంటి మల్టీ టాలెంటెడ్ యాక్టర్ కం డైరెక్టర్ ఇలా ఒకే జానర్ కు ఒకే సబ్జెక్టు కు కట్టుబడి పోవడం విచారకరం. మాస్-స్టైల్- డాన్ లాంటి ఒకదానికి ఒకటి సంబంధం లేని సినిమాలు చేస్తూ కమర్షియల్ గానూ మంచి సక్సెస్ అందుకుంటున్న లారెన్స్ ఇలా ముని మేనియాలో పడి తన టాలెంట్ ను సానబెట్టుకునే పని చేయడం లేదు. గెటప్పులు మారిస్తే చాలు కథ అదే ఉన్నా పర్లేదు అనుకునేలా లారెన్స్ కాంచన 4 కోసం అప్పుడే బామ్మ వేషం రెడీ ఉంచుకున్నాడని ఆ షాట్ ని బట్టి అర్థమైపోయింది. సో దీనికి ఎప్పుడు బ్రేక్ వేస్తాడో తెలియదు కాని కాంచనల ప్రవాహం మాత్రం ఇప్పుడప్పుడే ఆగేలా లేదు