‘మిస్టర్’తో మాస్టర్ ఢీ

ఈ నెల 14న వరుణ్ తేజ్-శ్రీను వైట్లల ‘మిస్టర్’ రిలీజవుతున్న సంగతి తెలిసిందే. ముందు రోజు దానికి పోటీగా ‘బాబు బాగా బిజీ’ సినిమా విడుదల కావాల్సి ఉండగా.. ఆ చిత్రాన్ని అనుకోకుండా మే 5కు వాయిదా వేయడంతో ఒక అడ్డంకి తొలగిపోయినట్లయింది. కానీ ‘మిస్టర్’కు సోలోగా రిలీజయ్యే అవకాశం మాత్రం దక్కట్లేదు. దానికి పోటీగా తమిళ డబ్బింగ్ మూవీ ‘శివలింగ’ రాబోతోంది. రాఘవ లారెన్స్ కథానాయకుడిగా నటించిన ఈ చిత్రాన్ని తమిళంతో పాటు తెలుగులోనూ ఒకేసారి.. ఏప్రిల్ 14న రిలీజ్ చేయనున్నారు. రిలీజ్ డేట్ పోస్టర్లు కూడా వదిలేశారు. కాబట్టి ‘మిస్టర్’తో డ్యాన్స్ మాస్టర్ పోటీ తప్పదన్నమాటే. ‘శివలింగ’ కన్నడలో అదే పేరుతో రిలీజై సూపర్ హిట్టయిన సినిమా రీమేక్. ‘చంద్రముఖి’ ఫేమ్ పి.వాసు దర్శకత్వం వహించాడు. కన్నడలో శివరాజ్ కుమార్ హీరోగా నటించగా.. తమిళంలో ఆయన పాత్రను లారెన్స్ చేస్తున్నాడు.

‘చంద్రముఖి’ స్టయిల్లోనే ఈ సినిమా కూడా సాగుతుందని దీని ట్రైలర్ చూస్తేనే అర్థమవుతోంది. లారెన్స్ ఇందులో రెండు షేడ్స్ ఉన్న క్యారెక్టర్ చేస్తున్నాడు. అతడి సరసన ‘గురు’ ఫేమ్ రితికా సింగ్ కథానాయికగా నటించడం విశేషం. ‘గురు’తో రితికా పేరు తెలుగులో బాగానే చర్చనీయాంశం అవుతోంది. ఈ సినిమా రిలీజైన మూడు వారాలకే ‘శివలింగ’ రాబోతుండటం దానికి కలిసొచ్చే విషయమే. మరి ‘మిస్టర్’కు ‘శివలింగ’ ఏమాత్రం పోటీ ఇస్తుందో చూద్దాం.

Like Us on Facebook : https://www.facebook.com/Tupakidotcom/