దర్శకేంద్రుకు ప్లస్ జేకె భారవి.. భక్తిరసం పిండేస్తారా.. ?

దర్శకేంద్రుడు కె రాఘవేంద్రరావు లేటెస్ట్ గా పెళ్ళి సందడి మూవీలో తొలిసారి నటుడిగా అవతారం ఎత్తి మెప్పించారు. ఆ మూవీకి ఆయన దర్శకత్వ పర్యవేక్షణ కూడా చేశారు. ఇక నటుడిగా ఆయన్ని బిజీ చేసే పనిలో మరో నటుడు తనికెళ్ళ భరణి ఉన్నారు. అయితే చాన్స్ దొరికితే మళ్ళీ మెగా ఫోన్ పట్టడానికి రాఘవేంద్రరావు చూస్తూనే ఉంటారు.

ఈ నేపధ్యంలో ఒక ఆసక్తికరమైన వార్త కొన్ని రోజులుగా చక్కర్లు కొడుతోంది. అదేంటి అంటే దర్శకేంద్రుడు మరోమారు భక్తిరసాన్ని చిందించే మూవీని డైరెక్ట్ చేయబోతున్నారని. ఆ మూవీయే రామానుజాచార్య అని. ఈ టైటిల్ ఇపుడు బాగా వినిపిస్తొంది. అవును ప్రముఖ నిర్మాత సి కళ్యాణ్ ఈ మూవీని తీస్తాను అని ఈ మధ్యనే ప్రకటించారు.

ఆయన తన హీరో బాలయ్యబాబుతో ఈ మూవీని చేసి తీరుతాను అని తన పుట్టిన రోజు వేడుకల సందర్భంగా ప్రకటించారు. అయితే దాని మీద ఇపుడు మరో అడుగు పడింది అంటున్నారు. ఈ మూవీకి సంబంధించిన స్క్రిప్ట్ ని ఇప్పటికే ప్రముఖ రచయిత జేకే భారవి రెడీ చేసి ఉంచారట. ఆయన రామానుజాచార్య నిండు జీవితాన్ని కాచి వడబోసి మరీ కధను రూపొందించారు అంటున్నారు.

ఇక జేకే భారవి తొలిసారిగా కె రాఘవేంద్రరావు కాంబోలో అన్నమయ్యకు పనిచేశారు. అది సూపర్ డూపర్ హిట్. ఆ తరువాత వీరి కాంబోలో శ్రీ మంజునాధ, శ్రీరామ‌దాస్, పాండురంగడు, షిరిడీ సాయి, ఓం నమో వెంకటేశాయా మూవీస్ వచ్చాయి. అయితే ఓం నమో వెంకటేశాయ తరువాత ఈ ఇద్దరూ చాలా కాలానికి రామానుజాచార్య మూవీతో జట్టు కట్టబోతున్నారుట.

అదే విధంగా పాండురంగడు తరువాత బాలయ్యతో రాఘవేంద్రరావు ఈ మూవీకి పనిచేస్తారని చెబుతున్నారు. బాలయ్య అఖండ విజయంతో మంచి ఊపు మీద ఉన్నారు. అయితే ఆయన జై సింహా సక్సెస్ మీట్ లో రామానుజాచార్య మూవీ చేస్తాను అని ప్రకటించారు. మరి అనుకున్నవన్నీ కుదిరితే వచ్చే ఏడాదిలోనే ఈ మూవీ సెట్స్ మీదకు వస్తుంది అంటున్నారు. సో బాలయ్య ఫ్యాన్స్ కి మంచి ఖుషీ ఇచ్చే న్యూస్ గానే దీన్ని చూడాలి.