తెరపై రాఘవేంద్రరావు.. అబ్బే ఉత్తిదే

దిగ్గజ దర్శకుడు కె.రాఘవేంద్రరావు త్వరలో తెరంగేట్రం చేయబోతున్నారని బోలెడన్ని రూమర్స్ వచ్చాయి. దిల్ రాజు నిర్మాణంలో తెరకెక్కనున్న ఓ చిత్రంలో ఈయన నటించబోతున్నారని చాలానే హంగామా జరిగింది. ఇన్ని దశాబ్దాల్లో ఎప్పుడూ ఓ రోల్ కూడా చేయని రాఘవేంద్రరావు.. తొలిసారిగా 'శతమానం భవతి' అనే మూవీలో ఫుల్ లెంగ్త్ రోల్ చేస్తారనే టాక్ తో.. బాగా ఆసక్తి నెలకొంది.

శతమానం భవతి అనే టైటిల్ సినిమా నిర్మించేందుకు దిల్ రాజు గతంలోనే నిర్ణయించుకున్నాడు. సతీష్ వేగ్నేశను దర్శకుడిగా పరిచయం చేస్తూ.. మెగా సుప్రీం స్టార్ సాయిధరం తేజ్ తో ఈ సినిమా తీయాలని అనుకున్నారు. కానీ ఈ మూవీలో తేజు ప్లేస్ లోకి కొత్త కుర్రాడు రాజ్ తరుణ్ వచ్చాడు. అయితే హీరో మారినా ప్రాజెక్ట్ మాత్రం పక్కా అని కన్ఫాం అయింది. ఇంకా హీరోయిన్ ని ఫైనలైజ్ చేయలేదు కానీ.. ఇప్పటికే పలువురిని సంప్రదించారు.

ఈ సినిమాలో ఓ కీలక పాత్రలో నటించేందుకు రాఘవేంద్రరావు సరే అన్నారనే వార్తల కారణంగా.. చాలా క్యూరియాసిటీ పెరిగింది. ఇంతటి దిగ్గజ దర్శకుడు ఓ కేరక్టర్ చేయడమంటే.. ఆ పాత్రకు చాలా ఇంపార్టెన్స్ ఉంటుందని అనుకున్నారు. కానీ ఇప్పుడీ వార్తలన్నీ రూమర్స్ అని తేలిపోయింది. అసలు రాఘవేంద్రరావును రోల్ కోసం సంప్రదించలేదని చెబుతోంది యూనిట్. త్వరలో హీరోయిన్ ని ఫైనలైజ్ చేసి, శతమానం భవతిని సెట్స్ పైకి తీసుకెళ్లనున్నాడు దిల్ రాజు.