మరోసారి వస్తున్న అన్నమయ్య..

కె. రాఘవేంద్రరావు దర్శకత్వంలో రూపొందిన అన్నమయ్య చిత్రం అనేక సంచలనాలు సృష్టించింది. అనేక అన్నమయ్య కీర్తనలను హృద్యంగా తెరకెక్కించి.. టాలీవుడ్ చరిత్రలో మిగిలిపోయే ఓ క్లాసిక్ మూవీని అందించారు రాఘవేంద్రరావు. ఇప్పుడీయన తిరుమల తిరుపతి దేవస్థానం ఎగ్జిక్యూటివ్ బోర్డ్ లో ఉన్న సంగతి తెలిసిందే.

టీటీడీకి సంబంధించిన అభివృద్ధి, మీడియా సంబంధిత కార్యక్రమాలన కేఆర్ ఆర్ చూసుకుంటున్నారు. ఇప్పుడో మహత్తర కార్యక్రమానికి రాఘవేంద్రరావు తెరతీశారని తెలుస్తోంది. 'అన్నమయ్య పాటకు పట్టాభిషేకం' పేరుతో త్వరలో ఓ కొత్త కార్యక్రమాన్ని ప్రారంభించనున్నారు కేఆర్ ఆర్. శ్రీ వెంకటేశ్వర భక్తి ఛానల్ లో ప్రసారమయ్యే ఈ ప్రోగ్రాంలో.. ఇప్పటివరకూ వినని అన్నమయ్య కీర్తనలను వినిపించనున్నారట.

ఇందుకోసం ఇప్పటికే బోలెడంత పరిశోధన కూడా పూర్తి చేశారని సమాచారం. ఈ కీర్తనలకు సంగీత దర్శకుడు ఎంఎం కీరవాణి మ్యూజిక్ ఇస్తుండగా.. ప్రముఖులైన సింగర్స్ అందరూ పాల్గొంటారని తెలుస్తోంది. సింగర్ సునీత 'అన్నమయ్య పాటకు పట్టాభిషేకం'ను హోస్ట్ చేయనుంది.