దర్శకేంద్రుడు సినిమా కాదు - వెబ్‌ సిరీస్‌!

శతాధిక చిత్రాల దర్శకుడు రాఘవేంద్ర రావు ఈ మద్య కాలంలో మెగా ఫోన్‌ పట్టుకోవడం లేదు. తెలుగు ప్రేక్షకులకు ఎన్నో అద్బుతమైన చిత్రాలను అందించిన రాఘవేంద్ర రావు దర్శకత్వం చేయకపోవడంతో ప్రేక్షకులు నిరాశను వ్యక్తం చేస్తున్నారు. మద్య రాఘవేంద్ర రావు ఒక చిన్న చిత్రాన్ని తెరకెక్కించేందుకు ఏర్పాట్లు చేస్తున్నారని - కోటి లోపు బడ్జెట్‌ తో అంతా కొత్త వారితో ఒక చిత్రాన్ని తెరకెక్కించాలని భావిస్తున్నట్లుగా వార్తలు వచ్చాయి. అయితే ఆ వార్తలు నిజం కాదని, ప్రస్తుతం రాఘవేంద్ర రావు వెబ్‌ సిరీస్‌ ను ప్లాన్‌ చేస్తున్నట్లుగా సమాచారం అందుతుంది.

ప్రస్తుతం చిన్నా - పెద్దా అనే తేడా లేకుండా అంతా కూడా వెబ్‌ సిరీస్‌ లపై పడుతున్నారు. ప్రముఖ నిర్మాతలు - దర్శకులు కూడా వెబ్‌ సిరీస్‌ లను చేసేందుకు ఆసక్తి చూపుతున్న ఈ సమయంలో రాఘవేంద్ర రావు కూడా ప్రముఖ సంస్థ రిలయన్స్‌ తో కలిసి ఒక వెబ్‌ సిరీస్‌ ను చేసేందుకు సిద్దమయినట్లుగా సమాచారం అందుతుంది. రిలయన్స్‌ తో రాఘవేంద్ర రావు నిర్మాణ భాగస్వామిగా వ్యవహరిస్తాడట. అయితే ఆ వెబ్‌ సిరీస్‌ కు దర్శకేంద్రుడు దర్శకత్వం వహిస్తారా లేదంటే తన శిష్యులతో తన పర్యవేక్షణలో తెరకెక్కిస్తారా అనే విషయం తెలియాల్సి ఉంది. రాఘవేంద్ర రావు వెబ్‌ సిరీస్‌ ఎప్పుడు ఉంటుంది - ఎలా ఉంటుందనే విషయాలపై త్వరలోనే క్లారిటీ వచ్చే అవకాశం ఉంది.

రాఘవేంద్ర రావు సినిమా కోసం ఎదురు చూస్తున్న ప్రేక్షకులకు ఇది కాస్త నిరాశ కలిగించే విషయమే. వెబ్‌ సిరీస్‌ తర్వాత అయినా రాఘవేంద్ర రావు సినిమాను తెరకెక్కిస్తారని ఆశిద్దాం.