అఖిల్ సినిమాకు రెహ‌మాన్‌?

తెలుగులో చివ‌ర‌గా ఆరేళ్ల కింద‌ట ‘కొమరం పులి’ సినిమాకు సంగీతాన్నందించాడు ఎ.ఆర్.రెహ‌మాన్. త‌ర్వాత ద్విభాషా చిత్రాలు.. లేదా డ‌బ్బింగ్ సినిమాల‌తో తెలుగు ప్రేక్ష‌కుల్ని ప‌ల‌క‌రించాడు కానీ.. డైరెక్ట్ తెలుగు సినిమా మాత్రం చేయ‌లేదు ఈ ఆస్కార్ విన్నింగ్ మ్యూజిక్ డైరెక్ట‌ర్. ఐతే సుదీర్ఘ విరామం త‌ర్వాత రెహ‌మాన్ ఒక డైరెక్ట్ తెలుగు సినిమాకు సంగీతాన్నందిస్తాడ‌ని వార్త‌లొస్తున్నాయి. అది అక్కినేని అఖిల్ రెండో సినిమా అంటున్నారు. అనేక త‌ర్జ‌న భ‌ర్జ‌న‌ల అనంత‌రం ‘మ‌నం’ ఫేమ్ విక్ర‌మ్ కుమార్ ద‌ర్శ‌క‌త్వంలో త‌న రెండో సినిమా చేయ‌డానికి అఖిల్ ఫిక్స‌యిన సంగ‌తి తెలిసిందే. ఈ చిత్రానికి రెహ‌మాన్ సంగీతాన్నందించే అవ‌కాశాలున్నాయి.

విక్ర‌మ్ చివ‌రి సినిమా ‘24’కు రెహ‌మానే సంగీతాన్నందించాడ‌న్న సంగ‌తి తెలిసిందే. ఆ సంద‌ర్భంగా విక్ర‌మ్ కు అత‌డికి మంచి అండ‌ర్ స్టాండింగ్ వ‌చ్చింద‌ట‌. చాలా సెల‌క్టివ్ గా సినిమాలు ఎంచుకునే రెహ‌మాన్.. త‌న మ‌న‌సుకు న‌చ్చిన.. వేవ్ లెంగ్త్ క‌లిసే ద‌ర్శ‌కుల‌తోనే ప‌ని చేస్తాడు. విక్ర‌మ్ కూడా ఆ జాబితాలోకే చేరిన‌ట్లున్నాడు. అఖిల్ కోసం విక్ర‌మ్ త‌యారు చేసిన స్క్రిప్టు రెహ‌మాన్ కు న‌చ్చింద‌ని స‌మాచారం. ఒక వేళ రెహ‌మాన్ ఓకే అయితే అఖిల్ ల‌క్కీనే అని చెప్పాలి. అఖిల్ అన్న నాగ‌చైత‌న్య రెండు సినిమాల‌కు (ఏమాయ చేసావె.. సాహ‌సం శ్వాస‌గా సాగిపో) రెహ‌మాన్ సంగీతాన్నందించాడు. అవి రెండూ మ్యూజిక‌ల్ హిట్లే. నాగార్జున‌తో రెహ‌మాన్ చేసిన ఏకైక సినిమా ‘ర‌క్ష‌కుడు’ కూడా మ్యూజిక‌ల్ గా సూప‌ర్ హిట్టే.

Like Us on Facebook : https://www.facebook.com/Tupakidotcom/