కుర్రాడితో కుమారి.. మూడో సారి

కుర్ర హీరో రాజ్ తరుణ్.. యంగ్ హీరోయిన్ హేభా పటేల్ లు సక్సెస్ ఫుల్ జోడీ అనే విషయం ఇప్పటికే తేలిపోయింది. మొదటిసారి కుమారి 21ఎఫ్ లో జట్టు కడితే.. ఆ మూవీ రేంజ్ బ్లాక్ బస్టర్. ఆ తర్వాత ఈడోరకం ఆడోరకంలో కలిసి నటిస్తే.. సూపర్ హిట్ అయిపోయింది. దీంతో ఈ పెయిర్ తో మళ్లీ సినిమా చేసేందుకు కొన్ని ప్రయత్నాలు జరిగాయి కానీ.. అవేవీ వర్కవుట్ కాలేదు.

ఇప్పుడు అందగాడు అనే టైటిల్ పై.. ఓ మూవీలో రాజ్ తరుణ్-హేభా పటేల్ ల జంట కనువిందు చేయబోతోంది. గత నెల 26న షూటింగ్ ప్రారంభం కాగా.. శరవేగంగా షూటింగ్ జరుపుకుంటోందీ మూవీ. సీనియర్ కామెడీ హీరో.. ప్రస్తుతం కేరక్టర్ ఆర్టిస్టుగా వెలిగిపోతున్నా రాజేంద్ర ప్రసాద్ ఈ అందగాడులో కీలక పాత్ర పోషిస్తున్నాడు. నాగార్జున మూవీ ఢమరుకంతో పాటు పలు హిట్ చిత్రాలకు స్టోరీ అందించిన వెలిగొండ శ్రీనివాస్.. ఈ మూవీ తో దర్శకుడిగానూ అరంగేట్రం చేయనున్నాడు.

ఏకే ఎంటర్టెయిన్మెంట్స్ బ్యానర్ పై అందగాడు తెరకెక్కుతుండగా.. ఎమోషనల్ రొమాంటిక్ జోనర్ లో ఈ మూవీ కథ ఉంటుందట. దర్శకుడు చెప్పిన ఈ స్టోరీపై పూర్తి కాన్ఫిడెంట్ తో ఉన్నారు నిర్మాతలు. ప్రస్తుత షెడ్యూల్స్ ప్రకారం.. వచ్చే ఏడాది సమ్మర్ లో అందగాడు థియేటర్లలోకి వస్తాడట.