కుర్రాడు గెస్ట్ రోల్.. సరే కానీ

రాజ్ తరుణ్ నటించిన సినిమాలు.. ఈ మధ్య మరీ పెద్ద పెద్ద హిట్స్ ఏమీ అయిపోవడం లేదు. ప్రారంభంలో మాదిరిగా సెన్సేషనల్ హిట్స్ కూడా సాధించడం లేదు. అయితే.. మినిమం గ్యారంటీగా కొంత స్థాయిలో వసూళ్లు వచ్చేస్తున్నాయి. మూవీని పాస్ చేసేస్తున్నాయి. ఈ ఏడాది కిట్టుగాడు ఉన్నాడు జాగ్రత్త.. అంధగాడు అంటూ ప్రేక్షకుల ముందుకు వచ్చిన రాజ్ తరుణ్.. ఇప్పుడు రాజు గాడు అనే టైటిల్ తో రాబోతోన్నాడు. ఇది పొంగల్ కు విడుదల అవుతుందని ఇప్పటికే నిర్మాతలు చెప్పారు.

అయితే.. ఈలోగానే రాజ్ తరుణ్ నుంచి జనాలకు ఓ సర్ ప్రైజ్ వచ్చేసింది. అదే.. బెలూన్ మూవీ. జై.. అంజలి.. హీరోహీరోయిన్లుగా నటించిన ఈ పక్కా తమిళ్ హారర్ కామెడీ మూవీ ఇప్పుడు తెలుగులోనూ డబ్బింగ్ అయి.. బెలూన్ పేరుతోనే ఏకకాలంలోనే విడుదల కానుంది. ఈ సినిమాలో రాజ్ తరుణ్ ఓ క్యామియో చేశాడనే వార్తలు ముందు నుంచే ఉన్నాయి. అయితే.. రీసెంట్ గా రిలీజ్ చేసిన టీజర్ చూస్తే.. రాజ్ తరుణ్ క్యామియో మాత్రమే కాదని.. కీలకమైన రోల్ నే చేశాడని అర్ధమవుతుంది. అయితే.. రాజ్ తరుణ్ కి ఇలాంటి గెస్ట్ రోల్స్ ఎంత మాత్రం అచ్చొచ్చాయన్నదే అసలు పాయింట్. ఇప్పటివరకూ రెండు సార్లు ఇలాంటి రోల్స్ చేశాడు రాజ్ తరుణ్. ఒకటి నాని హీరోగా వచ్చిన మజ్ను మూవీ అయితే.. రెండోది నాన్న నేను నా బాయ్ ఫ్రెండ్స్.

గత రెండేళ్లలో నాని సినిమాల్లో లోయెస్ట్ పెర్ఫామర్ మజ్ను. రాజ్ తరుణ్ క్యామియో కూడా పెద్దగా ఏమీ క్లిక్ కాలేదు. ఆ వెంటనే నాన్న నేను నా బాయ్ ఫ్రెండ్స్ సినిమాలో కూడా కనిపించాడు కానీ.. ఈ సినిమా అసలే మాత్రం ఎఫెక్ట్ చూపించలేకపోయింది. ఎలా చూసుకున్నా రాజ్ తరుణ్ క్యామియో చేసిన సినిమాల్లో ఒకటి యావరేజ్.. ఒకటి ఫట్టు. ఇప్పుడు ముచ్చటగా మూడోసారి క్యామియో చేస్తున్న బెలూన్.. పేలుతుందో.. పేలిపోతుందో చూడాలి.