వ‌ర్మ క‌థ‌... రాజ్‌ త‌రుణ్ ద‌ర్శ‌క‌త్వం

వావ్... ఇంత‌కంటే క్రేజీ సినిమా మ‌రొక‌టి ఉంటుందా? వాట్టే కాంబినేష‌న్ అనిపిస్తోంది క‌దూ! కానీ ఇది నిజం. సినిమా ఎప్పుడు సెట్స్‌ పైకి వెళుతుందో తెలియ‌దు కానీ... ఆ ఇద్ద‌రి మ‌ధ్య ఈ ర‌కంగా మాత్రం ఒప్పందం కుదిరింద‌ట‌. ఆ విష‌యాన్ని స్వ‌యంగా రాజ్‌ త‌రుణే చెప్పుకొచ్చాడు ఓ ఇంట‌ర్వ్యూ లో. ఇప్పుడిప్పుడే క‌థానాయ‌కుడిగా అడుగులు వేస్తున్నాడు కానీ... వ‌రుస‌గా విజ‌యాలు అందుకుంటున్నాడు రాజ్ త‌రుణ్‌. కానీ ఆయ‌న‌లో మంచి ద‌ర్శ‌కుడు కూడా ఉన్నాడు. యాభైకి పైగా షార్ట్‌ ఫిల్మ్‌ లు చేసిన అనుభ‌వం ఆయ‌న‌ది. ద‌ర్శ‌కుడు కావాల‌నే ప‌రిశ్ర‌మ‌లోకి అడుగుపెట్టాడు. కానీ అనుకోకుండా క‌థానాయ‌కుడైపోయాడు.

అంతే కాదు.. వ‌రుస‌గా మూడు విజ‌యాలు అందుకొని హ్యాట్రిక్ హీరో అనిపించుకున్నాడు. అయితే ఎంత హీరోగా బిజీ అయిన‌ప్ప‌టికీ ఆయ‌న‌కి ద‌ర్శ‌క‌త్వం చేయాల‌న్న కోరిక మాత్రం త‌గ్గ‌డం లేదు. ఎప్ప‌టికైనా నాదైన సినిమాని తెర‌పై చూసుకుంటా అంటున్నాడు. అందుకే సెట్ నుంచి ఇంటికి రాగానే క‌థ‌లు రాసుకుంటూ గ‌డుపుతుంటాడ‌ట‌. ఆ ఆస‌క్తి గురించి తెలుసుకొన్న రామ్‌ గోపాల్ వ‌ర్మ రాజ్‌ త‌రుణ్‌ కి ఓ బంప‌ర్ ఆఫ‌ర్ ఇచ్చాడు.

తాను రాసుకొన్న ఓ ప్రేమ‌క‌థ‌ని ఇచ్చి, దాన్ని నువ్వు డైరెక్ట్ చేయ‌మ‌ని రాజ్‌ త‌రుణ్‌ ని స్వ‌యంగా కోరాడ‌ట వ‌ర్మ‌. లెజెండ‌రీ డైరెక్ట‌ర్ అయిన వ‌ర్మ నుంచి అలాంటి ఆఫ‌ర్ వ‌స్తే ఎవ‌రు మాత్రం కాద‌నుకుంటారు? రాజ్‌ త‌రుణ్ కూడా ఎగిరి గంతేశాడ‌ట‌. అయితే త్వ‌ర‌లోనే రామ్‌ గోపాల్ వ‌ర్మ ద‌ర్శ‌క‌త్వంలో రాజ్‌ త‌రుణ్ ఓ మూకీ సినిమా చేయ‌బోతున్నాడు. ఆ ప్రాజెక్టు త‌ర్వాతే ద‌ర్శ‌క‌త్వం గురించి ఆలోచిస్తాన‌ని చెప్పాడ‌ట రాజ్ త‌రుణ్‌. ఆ విష‌యం గురించి ఆయ‌న ఇంట‌ర్వ్యూ లో చెబుతూ... ``రామ్‌ గోపాల్ వ‌ర్మ‌గారు రంగీలా కంటే అద్భుత‌మైన ప్రేమ‌క‌థ రాశారు. ఆ క‌థ గురించి విన‌గానే దాంతో ఎలాగైనా సినిమా తీయాల‌నిపించింది. కానీ ఇప్పుడు నేనున్న ప‌రిస్థితుల్లో అది సాధ్యం కాదు. భవిష్య‌త్తులో మాత్రం ఆ క‌థ‌ని నేనే తెర‌కెక్కిస్తా`` అన్నాడు.