నాని తీసే షార్టు ఫిలింలో రాజ్ తరుణ్‌

మజ్ను అంటూ త్వరలో వచ్చేయనున్నాడు నాని. ప్రేమించడం ప్రారంభించండి అంటూనే తాగడం మానేయమని నాని ఓ మెసేజ్ కూడా ఇస్తుండగా.. ఈ మూవీపై ఈమధ్య ఓ రూమర్ బయల్దేరింది. యంగ్ హీరో రాజ్ తరుణ్.. మజ్నులో ఓ గెస్ట్ రోల్ చేయనున్నాడనే పుకార్లు బయల్దేరాయి. అయితే.. ఇవి రూమర్స్ కాదని. తమ మూవీలో రాజ్ తరుణ్ యాక్ట్ చేస్తున్నాడని మజ్ను మేకర్స్ చెప్పేశారు.

ఏ సినిమానైనా సింగిల్ హ్యాండ్ తో లాగేయగల ట్యాలెంట్ ఉన్న నానికి.. రాజ్ తరుణ్ తో పనేంటి అనే డౌట్ ఎవరికైనా రావచ్చు. అయితే.. స్టోరీ ప్రకారం ఓ కుర్ర హీరోను తీసుకోక తప్పనిసరి పరిస్థితి. మజ్నులో నాని చేస్తున్న కేరక్టర్ అసిస్టెంట్ డైరెక్టర్. అటు ప్రేమను గెలిపించుకోవడం.. అటు తనను తాను ప్రూవ్ చేసుకోవాల్సిన పరిస్థితి ఎదురవుతుంది. అలాంటి టైమ్ లో ఓ షార్ట్ ఫిలిం తీస్తాడట నాని. అందులో హీరో పాత్రనే యంగ్ హీరో రాజ్ తరుణ్ తో చేయిస్తున్నారు. ఈ కుర్రాడు కూడా షార్ట్ ఫిలిమ్స్ నుంచి హీరోగా ఎదిగిన సంగతి అందరికీ తెలిసిన విషయమే కదా. అందుకే ఇలా మ్యాచ్ చేశారని టాక్.

మజ్నులో రాజ్ తరుణ్ రోల్ క్లైమాక్స్ లో వస్తుందని తెలుస్తోంది. ఫ్రేమ్ పై ఈ కుర్ర హీరో ఉన్నంతసేపు కామెడీ అద్భుతంగా పండుతుందట. అంత పర్ఫెక్ట్ గా ఈ సీన్స్ వస్తున్నాయని అంటున్నారు. విరించి వర్మ దర్శకత్వంలో తెరకెక్కనున్న మజ్నును.. సెప్టెంబర్ 17న విడుదల చేసేందుకు సన్నాహాలు చేసుకుంటున్నారు దర్శక నిర్మాతలు.