రాజ్ తరుణ్.. 20 బెస్ట్ ఫ్రెండ్స్..

సెలబ్రిటీలకే కాదు.. సాధారణంగా కుక్కలను పెంచుకునే అలవాటు చాలామందికి ఉంటుంది. అఫ్ కోర్స్.. అవి కుక్కలే అయినా.. వాటిని పేరు పెట్టి పిలవకుండా కుక్క అంటే చాలామందికి కోపం వస్తుంది లెండి. అది వేరే విషయం. కానీ కుక్కలను ఇష్టపడ్డం వేరు, ప్రేమించడం వేరు. కుక్కలంటే ఎంత ప్రేమ ఉంటే మాత్రం.. ఎవరైనా 20 కుక్కలను ఇంట్లో తెచ్చి పెంచేసుకుంటారా? కుర్ర హీరో రాజ్ తరుణ్ అలాగే చేస్తున్నాడు. ప్రస్తుతం ఇతని ఇంట్లో 20 పెంపుడు కుక్కలు ఉన్నాయి. 22 ఏళ్ల ఈ హీరో 20 కుక్కలను పెంచేసుకుంటూ అందరినీ ఆశ్చర్యంలో ముంచెత్తుతున్నాడు.

'నేను ఎవరికైనా మంచి బాయ్ ఫ్రెండ్ అవుతానో లేదో తెలీదు కానీ.. వీటన్నిటికీ మాత్రం నేనంటే చాలా ఇష్టం' అంటున్నాడు రాజ్ తరుణ్. మరి ఇన్ని కుక్కలంటే.. వాటి పేర్లు గుర్తుండడం కష్టం కదా అంటే.. అబ్బే అదేం లేదంటూ వాటి పేర్లను వరుసగా చదివేస్తున్నాడు. 'హన్నా - షాడో - పండు - కోకో - స్కూబీ - రాకీ - కాండీ - రూడీ - మిన్నీ.. మరో పదకొండింటికి ఇంకా పేర్లు పెట్టాలి' అని చెప్పాడీ కుర్ర హీరో. వీటితో పాటు తాను కలిసి ఉంటున్నా ఎలాంటి ఇబ్బంది లేదని.. ప్రస్తుతం ఉన్న ఇల్లు అవన్నీ సుఖంగా ఉండేలా స్పెషల్ గా డిజైన్ చేయించుకున్నట్లు చెప్పాడు రాజ్ తరుణ్.

జెర్మన్ షెపర్డ్ - లాబ్రడార్ - స్ట్రే - పొమెరియన్స్ లాంటివి ఉన్నా.. 'వీటికి ఏదేదో ట్రైనింగ్ ఇవ్వాలని అనుకోవడం లేదు. వాటినలా స్వేచ్ఛగా వదిలేయడం నాకు ఇష్టం' అంటూ తన పెంపుడు కుక్కలపై ప్రేమ చాటుకున్నాడు రాజ్ తరుణ్.