రాజుగాడు రెడీ అయిపోయాడట!

గతేడాదంతా రైజింగ్ లో ఉన్న రాజ్ తరుణ్ కెరీర్ ఇప్పుడు కాస్త జోరు తగ్గిందా? అవుననే అంటున్నాయి ఫిల్మ్ నగర్ వర్గాలు. ఎందుకంటే ఈ ఏడాది రాజ్ తరుణ్ నుంచి రెండు సినిమాలు ఆశించినంత స్థాయిలో ఆడలేదు. రాజ్ తరుణ్ - అను ఇమాన్యుల్ కాంబినేషన్ లో ఉన్న కిట్టు ఉన్నాడు జాగ్రత్త యావరేజ్ టాక్ తెచ్చుకున్నప్పటికీ ఆ తరువాత విడుదలైన అంధగాడు మాత్రం బాక్సాఫీస్ దగ్గర బోల్తాకొట్టేసింది. అయితే ఈ రెండు సినిమాల్ని విడుదల చేసిన ఏకే ఎంటర్ టైన్ మెంట్స్ వారు సైలెంట్ గా రాజ్ తరుణ్ తో మరో సినిమా తెరకెక్కించి విడుదలకి రెడీ చేసినట్లుగా తెలిసింది.

నిజానికి కిట్టు ఉన్నాడు - అంధగాడు కంటే ముందే విడుదల కావాల్సిన ఈ కొత్త సినిమా కొన్ని కారణాల వల్ల ఆగిపోయిందని టాక్. నూతన దర్శకురాలు సంజనారెడ్డి డీల్ చేసిన ఈ సినిమాకు రాజుగాడు అనే టైటిల్ కన్ఫామ్ చేశారు. ఈ సినిమాలో బాలీవుడ్ భామ అమైరా దస్తూర్ హీరోయిన్ గా నటించింది. దాదాపు 90 శాతం చిత్రీకరణ ముగించుకున్న ఈ సినిమాను ఆక్టోబర్ లేక నవంబర్ లో విడుదల చేసేందుకు సన్నహాలు జరుగుతున్నాయి. ఇదే గనుక జరిగితే ఈ ఏడాదిలో రాజ్ తరుణ్ నుంచి మూడు సినిమాలు వచ్చినట్లు అవుతుంది. మరి ఈ మూడో సినిమాతోనైనా రాజ్ కు సరైన సక్సెస్ వస్తుందేమో చూద్దాం.