బాలయ్య.. నాని.. ఇప్పుడు రాజ్ తరుణ్‌

టాలీవుడ్ లో ప్రస్తుతం చాలా బిజీగా ఉన్న నటుల్లో రాజ్ తరుణ్ ఒకడు. సింపుల్ గా ఉయ్యాల జంపాల సినిమాతో హిట్టు కొట్టిన యువ హీరో కుమారి 21F సినిమా వరకు సక్సెస్ ట్రాక్ ని బాగానే మెయింటెన్ చేశాడు. కానీ ఆ తర్వాత వచ్చిన సినిమాలు అంతగా ఆకట్టుకోకపోవడంతో మనోడు డిఫరెంట్ గా ట్రై చెయ్యాలని అనుకుంటున్నాడు. ప్రస్తుతం తీరిక లేకుండా షూటింగ్ లతో గడుపుతున్నాడు. ఏకే ఎంటర్టైన్మెంట్స్ వారి నిర్మాణంలో రాజు గాడు అనే సినిమాను చేస్తున్నాడు. అలాగే అన్నపూర్ణ స్టూడియోస్ లో రంగుల రాట్నం అనే సినిమాలో నటిస్తున్నారు.

అయితే రాజ్ తరుణ్ కి ఈ రెండు సినిమాల వలన ఒక ఇబ్బందిని ఎదుర్కోబోతున్నాడట. నిజంగా ఈ రోజుల్లో ఏ హీరోకి ఇలాంటి సమస్య రాదేమో. అసలు విషయం ఏమిటంటే.. మొదట రాజుగాడు నిర్మాతలు సంక్రాంతి కి రిలీజ్ చెయ్యాలని అనుకున్నారు. అయితే తెలిసి చేసిందో తెలియక చేసిందో గాని అన్నపూర్ణ స్టూడియోస్ కూడా రంగుల రాట్నం సినిమాను అదే డేట్ కి రిలీజ్ చెయ్యాలని ఫిక్స్ అయ్యారు.

రెండు తన సినిమాలే కాబట్టి హీరోగారు కూడా ఏం చెప్పలేకపోతున్నారట. నిర్మాతలు కూడా మనసును మార్చుకోవడం లేదని టాక్. ఎలాగైనా సంక్రాంతి హాలిడేస్ ని క్యాష్‌ చేసుకోవాలని చూస్తున్నారు. దీంతో ఒకే రోజు ఈ కుర్ర హీరో సినిమాలు రిలీజ్ కి సిద్ధమయ్యాయి. అప్పట్లో బాలకృష్ణ ( నిప్పు రవ్వ - బంగారు బుల్లోడు ) అలాగే నాని (ఎవడే సుబ్రహ్మణ్యం - జెండా పై కపిరాజు ) సినిమాలు ఒకే సారి రిలీజ్ అయ్యాయి. ఇప్పుడు రాజ్ తరుణ్ కి కూడా అదే అనుభవాన్ని ఎదుర్కొంటున్నాడు. చూద్దాం.. చివరకు ఏమవుతుందో!!