లాస్యతో పెళ్ళి చేసినందుకు థ్యాంక్స్ -రాజ్ తరుణ్‌

యంగ్ హీరో రాజ్ తరుణ్.. బుల్లితెర యాంకర్ లాస్య పెళ్లి చేసుకున్నారంటూ సోషల్ మీడియాలో వార్తలు గుప్పుమన్నాయి. ఒకటి రెండు పేపర్లకు సంబంధించిన వెబ్ ఎడిషన్స్ లో కూడా ఈ వార్త రావడంతో.. చాలామంది ఈ గాసిప్పును నిజమే అనే పరిస్థితి ఏర్పడింది. సోషల్ మీడియాలో అయితే రాజ్ తరుణ్-లాస్య సీక్రెట్ మ్యారేజ్ అంటూ ఈ న్యూస్ తెగ షేర్ అయిపోయింది. ఇప్పుడీ అంశంపై రాజ్ తరుణ్ పక్కా క్లారిటీ ఇచ్చేశాడు.

నేను లాస్య పెళ్లి చేసుకున్నామనే రూమర్ పై క్లారిటీ అంటూ తన వివరణను పోస్ట్ చేశాడు రాజ్ తరుణ్. 'సభకు నమస్కారం.. నా సంబంధం లేకుండా.. నా ప్రమేయం లేకుండా.. కుమారి 21ఎఫ్ ఆడియో రిలీజ్ లో ఒకే ఒక్కసారి కలిసిన లాస్యతో నా పెళ్లి చేసిన కొంత మంది మీడియా మిత్రులకు వెబ్ సైట్ దారులకు నా కృతజ్ఞతలు' అంటూ కాస్త వెటకారంతో ఓపెన్ లెటర్ మొదలుపెట్టిన రాజ్ తరుణ్.. తర్వాత అసలు సంగతిని కూడా రాసుకొచ్చాడు.

'వెటకారానికి సారి. కానీ ఇలాంటి ఫన్నీ రూమర్లపై నాకు ఇంతకంటే ఎలా స్పందించాలో అర్ధం కాలేదు. నాకు కనీసం మరో మూడేళ్లవరకూ పెళ్లి చేసుకునే ఆలోచన లేదు. నేను ఇప్పుడు ఏ బంధంలోకి వెళ్లే పరిస్థితి లేదు. నేను పెళ్లి చేసుకున్నపుడు అందరికీ తెలియచేస్తాను. ఆధారం లేని రూమర్ అయినా.. నా కోసం కొంత సమయం కేటాయించిన అందరికీ కృతజ్ఞతలు. మరోవైపు అసలీ ఈ రూమర్ గురించి ఏం తెలీకుండా చదివిన వారికి సారీ(టైమ్ వేస్ట్ చేసినందుకు)- థాంక్యూ - రాజ్ తరుణ్' అంటూ క్లియర్ కట్ గా చెప్పేశాడు ఈ కుర్ర హీరో.