రాజా డీల‌క్స్‌.. ప్ర‌భాస్ లుక్ అదిరిందిగా!

పాన్ ఇండియా స్టార్ ప్ర‌భాస్ ప్ర‌స్తుతం వ‌రుస క్రేజీ ప్రాజెక్ట్ ల‌లో న‌టిస్తూ క్ష‌ణం తీరిక లేని బిజీ షెడ్యూల్ తో బ్యాక్ టు బ్యాక్ సినిమాలు చేస్తున్నాడు. ప్ర‌భాస్ నాలుగు ప్రాజెక్ట్ ల‌లో న‌టిస్తున్న విష‌యం తెలిసిందే. ఇప్ప‌టికే బాలీవుడ్ డైరెక్ట‌ర్ ఓం రౌత్ తో చేస్తున్న `ఆది పురుష్‌` మూవీ షూటింగ్ పూర్త‌యింది. వీఎఫ్ ఎక్స్ వ‌ర్క్ లో భాగంగా ప్ర‌స్తుతం పోస్ట్ ప్రొడ‌క్ష‌న్ వ‌ర్క్ జ‌రుపుకుంటోంది. ఇందు కోసం మేక‌ర్స్ మ‌రో రూ. 100 కోట్లు కేటాయించారు. రీసెంట్ గా విడుద‌ల చేసిన టీజ‌ర్ పై విమ‌ర్శ‌లు వెల్లువెత్త‌డంతో చిత్ర బృందం తాజా నిర్ణ‌యం తీసుకుంది.

ఇదిలా వుంటే ఈ మూవీ త‌రువాత ప్ర‌భాస్ మూడు సినిమాల షూటింగ్ ల‌లో పాల్గొంటున్నాడు. ఇందులో ప్ర‌శాంత్ నీల్ `స‌లార్‌`తో పాటు నాగ్ అశ్విన్ `ప్రాజెక్ట్ కె` వుంది. వీటికి పూర్తి భిన్నంగా మారుతి డైరెక్ష‌న్ లో ప్ర‌భాస్ హార‌ర్ థ్రిల్ల‌ర్ ని చేస్తున్న విష‌యం తెలిసిందే. `బాహుబ‌లి` త‌రువాత నుంచి ఆ స్థాయిలో ఆక‌ట్టుకోలేక‌పోతున్న ప్ర‌భాస్ ఈ ఏడాది `రాధేశ్యామ్‌` మూవీతో భారీ డిజాస్ట‌ర్ ని సొంతం చేసుకుని షాకిచ్చిన విష‌యం తెలిసిందే.

ఈ విష‌యంలో కంగారు ప‌డుతున్న ప్ర‌భాస్ ఫ్యాన్స్ ఈ సారి `స‌లార్`తో ఎలాగైనా పాన్ ఇండియా బ్లాక్ బ‌స్ట‌ర్ ని సొంతం చేసుకుని విమ‌ర్శ‌ల‌కు చెక్ పెట్టాల‌ని ఆశ ప‌డుతున్నారు. ఈ నేఫ‌థ్యంలో వరుస డిజాస్ట‌ర్ ల‌తో షాకిస్తున్న మారుతితో ప్ర‌భాస్ సినిమా చేస్తుండ‌టం అభిమానుల‌ని షాక్ కు గురిచేసింది.

ప్ర‌స్తుత ప‌రిస్థితుల్లో అత‌నితో సినిమా ప్ర‌మాదం అని ఫ్యాన్స్ హెచ్చ‌రిస్తున్నా ప్ర‌భాస్ మాత్రం ఫ్యాన్స్ మాట‌ల‌ని ప‌ట్టించుకోకుండా మారుతి చెప్పిన క‌థ‌పై వున్న న‌మ్మ‌కంతో త‌న‌కు గ్రీన్ సిగ్న‌ల్ ఇవ్వ‌డ‌మే కాకుండా సైలెంట్ గా షూటింగ్ ని కూడా మొద‌లు పెట్టేశాడు.

`రాజా డీల‌క్స్` అనే టైటిల్ ఈ మూవీకి ప్ర‌చారంలో వుంది. మాళ‌వికా మోహ‌న‌న్‌, నిధి అగ‌ర్వాల్ హీరోయిన్ లుగా న‌టిస్తున్న ఈ మూవీలో మూడ‌వ నాయిక‌గా రిద్ది కుమార్ కూడా క‌నిపించ‌బోతోంది. ఓ పురాత‌న థిమేట‌ర్ నేప‌థ్య‌క్ంలో సాగే హార‌ర్ థ్రిల్ల‌ర్ గా ఈ మూవీని మారుతి తెర‌కెక్కిస్తున్నాడు. బాలీవుడ్ న‌టుడు సంజ‌య్ ద‌త్ కీల‌క పాత్ర‌లో న‌టిస్తున్న ఈ మూవీ ప్ర‌స్తుతం షూటింగ్ ద‌శ‌లో వుంది. తాజాగా ఈ మూవీ ఆన్ లొకేష‌న్ కి సంబంధించిన సెట్ లో సంద‌డి చేస్తున్న ప్ర‌భాస్ పిక్ ఒక‌టి నెట్టింట వైర‌ల్ గా మారింది.

గ‌త చిత్రాల‌కు పూర్తి భిన్న‌మైన మేకోవ‌ర్ తో ప్ర‌భాస్ స‌రికొత్త లుక్ లో క‌నిపిస్తున్న తీరు అభిమానుల్ని విశేషంగా ఆక‌ట్టుకుంటోంది. షూట్ గ్యాప్ లో కూల్ గా కూర్చుని ద‌ర్శ‌కుడు మారుతితో చ‌ర్చిస్తున్న ప్ర‌భాస్ ఫొటో ప్ర‌స్తుతం నెట్టింట వైర‌ల్ గా మారింది. ప్ర‌భాస్ లుక్ ని చూసిన ఫ్యాన్స్ కొంత వ‌ర‌కు హ్యాపీగా ఫీల‌వుతున్నార‌ట‌. ఈ సినిమాకు సంబంధించిన అఫీషియ‌ల్ అప్ డేట్ ని మేక‌ర్స్ ఎప్పుడు ఇస్తారో వేచి చూడాల్సిందే.