రాజమండ్రిలో పవన్ ఫ్యాన్స్ స్పెషల్ ట్రీట్

ఎప్పుడో 2013లో వచ్చింది ‘అత్తారింటికి దారేది’. తర్వాత ‘గోపాల గోపాల’ వచ్చినా అందులో పవన్ చేసింది అతిథి పాత్ర కాబట్టి దాన్ని లెక్కలోకి తీసుకోవాల్సిన పని లేదు. మరి దాదాపు మూడేళ్ల విరామం తర్వాత పవన్ కళ్యాణ్ సినిమా వస్తోందంటే అభిమానుల హంగామా మామూలుగా ఉంటుందా మరి. రెండు తెలుగు రాష్ట్రాల్లో.. దేశ విదేశాల్లో ‘సర్దార్ గబ్బర్ సింగ్’ మేనియా అప్పుడే మొదలైపోయింది. ఏప్రిల్ 8 కోసం ఎవరి స్థాయిలో వాళ్లు ఏర్పాట్లు చేసుకుంటున్నారు. సర్దార్ టీషర్టులు.. రుమాళ్లు.. టాటూల సందడి ఇప్పటికే తెలుగు రాష్ట్రాల్లో ఎక్కడ చూసినా కనిపిస్తోంది. ఇక రిలీజ్ ముందు రోజు రాత్రి హంగామా ఎలా ఉంంటుందో ప్రత్యేకంగా చెప్పాల్సిన పనిలేదు.

ఐతే అందరి దారిలో నడవకుండా ఏదైనా ప్రత్యేకంగా చేయాలన్న ఆలోచనతో రాజమండ్రి నగర పవన్ అభిమానులు.. ఫ్లాష్ మాబ్ కార్యక్రమాలకు ప్లాన్ చేస్తున్నారు. ఈ రోజు సాయంత్రం నుంచి విడుదల రోజు వరకు అనేక కార్యక్రమాలకు ప్రణాళిక రచించుకున్న రాజమండ్రి పవన్ ఫ్యాన్స్.. ఈ రోజు సాయంత్రం ఒకేసారి నగరంలోని వేర్వేరు ప్రాంతాల్లో ఫ్లాష్ మాబ్ తో సందడి చేయబోతున్నారు. బాగా జనాలున్న ప్రాంతలోకి వెళ్లి ఓ బృందం ఉన్నట్లుండి మ్యూజిక్ ప్లే చేసి డ్యాన్సులతో సందడి చేయడమే ఈ ఫ్లాష్ మాబ్. విదేశాల్లో ఇలాంటి కార్యక్రమాలు మామూలే. ఇప్పుడిప్పుడే మన నగరాల్లోనూ ఈ సంస్కృతి కనిపిస్తోంది. రాజమండ్రి లాంటి చోట్ల ఇలాంటి కార్యక్రమాలు జనాలు ఇంతకుముందెప్పుడూ చూసి ఉండరేమో. పవన్ ఫ్యాన్స్ ఈ కార్యక్రమంతో రాజమండ్రి జనాలకు ఓ ప్రత్యేక అనుభూతి కలిగించబోతున్నారన్నమాట.