మహేష్ సినిమాలో మరో హీరో లేడు.. జక్కన్న క్లారిటీ..!

సూపర్ స్టార్ మహేష్ బాబు - దర్శకధీరుడు రాజమౌళి కాంబినేషన్ లో ఓ సినిమా తెరకెక్కనున్న విషయం తెలిసిందే. 'ఆర్.ఆర్.ఆర్' తరువాతి సినిమా మహేష్ తో చేయబోతున్నట్లు దర్శకుడు ఇది వరకే క్లారిటీ ఇచ్చారు.

అయితే జక్కన్న ప్లాన్ చేసింది మల్టీస్టారర్ మూవీ అని.. #SSMB29 సినిమాలో మహేష్ తో పాటుగా మరో హీరోకి స్థానం ఉంటుందని టాక్ వచ్చింది. అంతేకాదు ఇందులో నందమూరి బాలకృష్ణ కనిపించబోతున్నారనే పుకార్లు పుట్టుకొచ్చాయి. దీనిపై తాజాగా రాజమౌళి స్పష్టత ఇచ్చారు.

RRR సినిమా ప్రమోషన్స్ లో భాగంగా ఇవాళ సాయంత్రం చిక్కబల్లాపూర్‌ లో ప్రీ రిలీజ్ ఈవెంట్ చేస్తున్నారు. దీని కోసం దుబాయ్ నుంచి బెంగుళూరుకు విచ్చేసిన చిత్ర బృందం.. మీడియాతో ముచ్చటించారు. ఈ సందర్భంగా నెక్స్ట్ ప్రాజెక్ట్ పై జక్కన్న మాట్లాడారు.

అది మల్టీస్టారర్ కాదని.. సింగిల్ హీరో ఫిల్మ్ అని రాజమౌళి తెలిపారు. దీంతో మహేష్ బాబు చిత్రంలో మరో స్టార్ కనిపించబోతున్నారనే రూమర్స్ కు చెక్ పడినట్లయింది. ఏదైతేనేం ఎట్టకేలకు మహేష్ - రాజమౌళి కాంబోలో సినిమా రాబోతున్నందుకు అభిమానులు ఖుషీ అవుతున్నారు.

పదకొండేళ్ల నుంచి వేచి చేస్తుండగా.. ఇన్నేళ్లకు ఓ ప్రాజెక్ట్ కార్యరూపం దాల్చుతుందని సంతోషం వ్యక్తం చేస్తున్నారు. రాజమౌళి 'ఆర్.ఆర్.ఆర్' సినిమా విడుదల తర్వాత కొన్ని రోజులు విశ్రాంతి తీసుకొని మహేష్ మూవీ మీద ఫోకస్ పెట్టనున్నారు. దీని కోసం డిఫరెంట్ స్టోరీ లైన్స్ అనుకుంటున్నట్లు దర్శకుడు ఇటీవల తెలిపారు.

మరోవైపు ప్రస్తుతం 'సర్కారు వారి పాట' చిత్రంలో నటిస్తున్న మహేష్.. త్రివిక్రమ్ శ్రీనివాస్ దర్శకత్వంలో #SSMB28 సినిమా చేయడానికి రెడీ అవుతున్నారు. ఇది పూర్తి చేసిన తర్వాత జక్కన్నతో చేతులు కలిపే అవకాశం ఉంది. దుర్గా ఆర్ట్స్ బ్యానర్ పై కేఎల్ నారాయణ ఈ క్రేజీ ప్రాజెక్ట్ ను భారీ బడ్జెట్ తో నిర్మించనున్నారు.

ఇదిలా ఉంటే RRR సినిమా టైటిల్ ను ఫిక్స్ చేయడంపై తాజాగా రాజమౌళి వివరణ ఇచ్చారు. RRR వర్కింగ్ టైటిల్ అని చెప్పినా ఫ్యాన్స్ వినిపించుకోలేదు. అదే బాగుంది.. మేము ఫిక్స్ అయిపోయాం అన్నారు. ఇక మేము కొన్ని టైటిల్స్ అనుకున్నప్పటికీ వాళ్ళ కోసమే RRR ను ఫిక్స్ చేశాం చేశామని జక్కన్న చెప్పుకొచ్చారు.