‘సోలో బతుకే సోబెటర్’ అంటున్న రాజమౌళి.. ఇండస్ట్రీ మొత్తం అటెన్షన్

సాయిధరమ్ తేజ్ తాజా చిత్రం ‘సోలో బతుకే సోబెటర్’. లాక్ డౌన్ అనంతరం థియేటర్లు తెరుచుకున్న తర్వాత బిగ్ స్క్రీన్ పై విడుదలవుతున్న మొదటి తెలుగు చిత్రం ఇది. క్రిస్మస్ సందర్భంగా ఈ నెల 25 న ఈ మూవీ విడుదల అవుతోంది.

ప్రస్తుత పరిస్థితుల్లో టాలీవుడ్ మొత్తం ఈ చిత్రం వైపే చూస్తోంది. లాక్ డౌన్ తర్వాత విడుదలవుతున్న తొలి చిత్రం కావడమే కాకుండా.. 50 శాతం ఆక్యుపెన్సీ ని భరిస్తూ రాబోతున్న మొదటి సినిమా కూడా ఇదే. దీంతో.. చిత్రం ఎలాంటి ఫలితాన్ని పొందబోతోంది? ప్రేక్షకుల స్పందన ఎలా ఉంటుంది? అనే చర్చ జోరుగా సాాగుతోంది. ఈ నేపథ్యంలో ఇండస్ట్రీ మొత్తం ఆసక్తిగా ఎదురుచూస్తోంది.

ఈ సినిమాకు వచ్చే ఫలితం ఆధారంగానే మిగిలిన నిర్మాతలు తమ చిత్రాల విడుదల విషయంలో నిర్ణయాలు తీసుకోనున్నారు. కాబట్టి.. తెలుగు ప్రేక్షకులకన్నా ఎక్కువగా.. ఇండస్ట్రీయే ఈ చిత్రం గురించి ఈగర్ గా వెయిట్ చేస్తోందని చెప్పొచ్చు. కాగా.. ఈ చిత్ర ప్రమోషన్లో బిజీగా ఉంది యూనిట్.

ఇందులో భాగంగా.. ఈ చిత్రం ప్రీ-రిలీజ్ ఈవెంట్ ను డిసెంబర్ 23న హైదరాబాద్‌లో నిర్వహించనున్నారు. ఈ వేడుకను ఘనంగా నిర్వహించడం ద్వారా ప్రేక్షకుల దృష్టిని ఆకర్షించడానికి ప్రయత్నిస్తున్నారు. ఇందుకోసం ఈ కార్యక్రమానికి టాలీవుడ్ టాప్ డైరెక్టర్ ఎస్ఎస్ రాజమౌళిని ముఖ్య అతిథిగా తీసుకొస్తున్నారు. సాయి తేజ్ ఇచ్చిన ఆహ్వానాన్ని జక్కన్న ఇప్పటికే అంగీకరించారు.

సుబ్బూ దర్శకత్వం వహించిన ఈ మూవీలో.. నభా నటేష్ నాయికగా నటిస్తోంది. బీవీఎస్ఎన్ ప్రసాద్ నిర్మిస్తున్నారు. ఇప్పటికే ఈ చిత్ర ట్రైలర్‌కు ప్రేక్షకుల నుండి మంచి స్పందన వచ్చింది.