నా విజన్ బాలీవుడ్లో ఎవరితో మ్యాచ్ కాదు: రాజమౌళి

'బాహుబలి' రెండు భాగాల విజయం ఎస్ ఎస్ రాజమౌళి క్రేజ్ దేశవ్యాప్తంగా ఆకాశాన్ని తాకింది. కానీ ఎంత క్రేజ్ ఉన్నప్పటికీ రాజమౌళి మాత్రం తన గొప్పదనాన్ని చాటుకోకుండా అణకువగానే ఉన్నాడు. ఇంటర్వ్యూలలో మీడియా ఎలాంటి ప్రశ్నలు వేసినప్పటికీ లౌక్యంగా సమాధానమిస్తూ వివాదాల బారిన పడకుండా ఉంటాడు. కానీ కరణ్ జోహార్ నిర్వహించే 'కాఫీ విత్ కరణ్' షోలో ఒక ప్రశ్నకు ఓపెన్ గా సమాధానమిచ్చి అందరినీ ఆశ్చర్యపరిచాడు.

కార్యక్రమంలో భాగంగా కరణ్ జోహార్ "బాలీవుడ్ లో ఏ డైరెక్టర్ విజన్ మీ విజన్ తో మ్యాచ్ అవుతుంది?" అని అడిగితే "ఎవ్వరితో మ్యాచ్ కాదు" అంటూ తడుముకోకుండా ఆన్సర్ ఇచ్చాడు. లౌక్యంగా జవాబిస్తే సంజయ్ లీలా భన్సాలి.. రాజుభాయ్ హీరాని లాంటి వారి పేరు చెప్పి ఉండొచ్చుగానీ రాజమౌళి మాత్రం ఓపెన్ గా ఎవరితో తన విజన్ మ్యాచ్ కాదని చెప్పడం విశేషం. ఈ సమాధానం చెప్పిన తర్వాత కరణ్ జోహార్ కూడా "నిజమే" అంటూ ఒప్పుకున్నాడు. రాజమౌళి విజన్ భారీ స్థాయిలో ఉంటుందన్న సంగతి అందరూ ఒప్పుకునేదే.. ఇతర దర్శకులు ఎవరూ ఆ విజన్ కు దరిదాపుల్లో లేరనేది కూడా వాస్తవమే. అయినా రాజమౌళి చేత చెప్పించడంలోనే కరణ్ టాలెంట్ బయటపడింది.

కరణ్ షో లో పాల్గొనే సెలబ్రిటీలను టఫ్ క్వశ్చన్స్ వేయడం.. వారు షాకింగ్ ఆన్సర్లు ఇవ్వడం చాలా కామన్. మరి రాజమౌళి-ప్రభాస్ -రానా లు హాజరైన ఈ ఎపిసోడ్ కోసం ప్రేక్షకులు ఎంతో ఇంట్రెస్ట్ చూపిస్తున్నారు. ఈ కరణ్ ఇంకా ఎన్ని క్లిష్టమైన ప్రశ్నలు సంధించాడో.. వారు ఎలాంటి జవాబులు ఇచ్చారో వేచి చూడాలి.