ద‌ర్శ‌కుడికి రాజ‌మౌళి ప‌ర్స‌న‌ల్ మెసేజ్‌..... నీ స్థాయి ఇదీ అని కామెంట్‌.. లీకైన చాట్‌!

తెలుగు సినిమా ఇండ‌స్ట్రీలో అగ్ర‌ద‌ర్శ‌కుడిగా కొన‌సాగుతున్నారు రాజ‌మౌళి. ఇప్ప‌టి వ‌ర‌కూ తీసిన ప్ర‌తీ సినిమా విజ‌యం సాధించ‌డంతో నెంబ‌ర్ 1 ద‌ర్శ‌కుడిగా పేరు తెచ్చుకున్న జ‌క్క‌న్న‌.. బాహుబ‌లి త‌ర్వాత ఆయ‌న రేంజ్‌ ఎవ‌రెస్ట్ ను తాకింది. ఇండియన్ సినిమాలోనే టాప్ డైరెక్ట‌ర్ గా నిలిచిన రాజ‌మౌళి క్రేజ్‌.. విదేశాల‌కు కూడా విస్త‌రించింది. అయితే.. తాజాగా రాజ‌మౌళి ఓ ద‌ర్శ‌కుడిపై కామెంట్ చేయ‌డం సంచ‌ల‌నంగా మారింది.

మ‌ల‌యాళం సినిమా గురించి ప‌రిశీలించిన‌ప్పుడు అక్క‌డ భారీ హంగూ ఆర్భాటాలు పెద్ద‌గా క‌నిపించ‌వు. క‌థ‌ను బ‌ట్టే బ‌డ్జెట్ కేటాయిస్తూ.. స‌క్సెస్ ఫుల్ సినిమాల‌ను నిర్మిస్తుంటారు అక్క‌డి మేక‌ర్స్‌. ఇలాంటి సినిమాగా వ‌చ్చి బ్లాక్ బ‌స్ట‌ర్ హిట్ గా నిలిచిన మూవీ దృశ్యం. మోహ‌న్ లాల్ ప్ర‌ధాన పాత్ర‌లో వ‌చ్చిన ఈ సినిమా ఇండియా వైడ్ గా సంచ‌ల‌న విజ‌యం సాధించింది.

దాదాపుగా భార‌త్ లోని అన్ని సినిమా ఇండ‌స్ట్రీల్లోనూ ఇది రీమేక్ అయ్యింది. తెలుగులో వెంక‌టేష్ ప్ర‌ధాన పాత్ర‌లో వ‌చ్చిన ఈ సినిమా ఇక్క‌డ కూడా అద్బుత‌మైన స‌క్సెస్ అందుకుంది. అయితే.. ఈ సినిమా గురించి ద‌ర్శ‌క‌ధీరుడు రాజ‌మౌళి త‌న అభిప్రాయం తెలియ‌జేశారు. అదికూడా.. దృశ్యం ద‌ర్శ‌కుడు జీతు జోసెఫ్ కు ప‌ర్స‌న‌ల్ గా మెసేజ్ చేశారు. ఆ స్క్రీన్ షాట్ సోష‌ల్ మీడియాలో క‌నిపించ‌డంతో వైర‌ల్ గా మారింది.

ఇటీవ‌ల ఓటీటీలో రిలీజ్ అయిన మ‌ల‌యాళం దృశ్యం-2 అద‌ర‌గొడుతున్న సంగ‌తి తెలిసిందే. మొద‌టి పార్టుకు ఏ మాత్రం త‌గ్గ‌కుండా అద్భుతంగా సాగిన ఈ సినిమా.. అన్ని వ‌ర్గాల ప్రేక్ష‌కుల‌నూ ఆక‌ట్టుకుంటోంది. ఈ నేప‌థ్యంలో తాను కూడా సినిమా చూశాన‌ని ద‌ర్శ‌కుడు జీతూకు మెసేజ్ చేశాడు జ‌క్క‌న్న‌.

‘‘హాయ్ జీతూ.. నేను రాజ‌మౌళిని. ఈ మధ్యనే దృశ్యం-2 చూశాను. ఆ వెంట‌నే మొద‌టి పార్టు చూశాను. గ‌తంలో తెలుగు వెర్ష‌న్ చూశాను. ఇప్పుడు మ‌ల‌యాళీ వ‌ర్ష‌న్ చూశాను. ఈ సినిమా డైరెక్ష‌న్‌, స్క్రీన్ ప్లే అన్నీ అద్భుతంగా ఉన్నాయి. మొత్తంగా ఈ చిత్రం అంత‌ర్జాతీయ స్థాయిలో ఉంది. మీ నుంచి ఇలాంటి మాస్టర్ పీస్ లు ఇంకా రావాలని ఆశిస్తున్నా’’ అని మెసేజ్ చేశాడు. ఈ చాట్ కు సంబంధించిన స్క్రీన్ షాట్ బయటకు వచ్చింది. సోషల్ మీడియాలో తెగ వైరల్ అవుతోంది.