ఏదో చేయమంటే చేప అయ్యాడు -రాజమౌళి

టాలీవుడ్ లో కాస్త ఆకట్టుకునే విధంగా కనిపించిన ప్రతీ సినిమాను చూస్తూ ఉంటాడు రాజమౌళి. ఫ్యామిలీతో కలిసి సినిమా చూడ్డమే కాదు.. ఆ చిత్రాన్ని ప్రోత్సహించే దిశగా ట్వీట్స్ కూడా పెడుతుంటాడు. ఈ మధ్య కాలంలో సన్నిహితులు.. సొంత వ్యక్తుల కోసం ఇచ్చిన జక్కన్న రివ్యూలు కొన్ని మిస్ ఫైర్ అయ్యాయి కానీ.. రాజమౌళి బాగుందని చెబితే ఆ సినిమా పక్కా హిట్ అనే ఫీలింగ్ జనాల్లో ఉంది.

అలాటి దర్శకధీరుడికి కూడా ఓ సినిమాను రిలీజ్ కంటే ముందే చూసేయాలని అనిపిస్తోంది. నాని నిర్మాతగా రూపొందిన 'అ' చిత్రం ట్రైలర్ చూసినప్పటి నుంచి.. సినిమా చూడాలని ఆతృత పడుతున్నట్లు.. ఆ చిత్రం ప్రీ రిలీజ్ ఈవెంట్ కు ముఖ్య అతిథిగా హాజరైన రాజమౌళి చెప్పుకొచ్చాడు. సహజంగా ఆయా సినిమాల యాక్టర్స్ గురించి ముందు మాట్లాడతామని.. కానీ ఈ చిత్రానికి మాత్రం మొదట డైరెక్టర్ గురించే మాట్లాడాలని అన్న రాజమౌళి.. కేవలం ఆర్టిస్టుల లిస్ట్ చూస్తేనే సినిమాలో ఏదో ఉందని అనిపించేలా చేయడం డైరెక్టర్ మొదటి సక్సెస్ అన్నాడు.

ఈ మధ్య కాలంలో నాని వరుస హిట్స్ కొడుతున్నాడని.. కౌంట్ తాను మర్చిపోయానని చెప్పిన రాజమౌళి.. నానికి కూడా గుర్తుండకపోవచ్చంటూ ఓ చమక్కును పేల్చాడు. నాని సినిమా అంటే హిట్ అనే ఫీలింగ్ వచ్చేసిందని.. అలాంటి నానికి ఇంకా ఏదో చేయాలని తాను సూచించినట్లు చెప్పాడు జక్కన్న. ఏ విషయం అయినా చెబితే నాని చేపలా మారిపోతాడని.. అంటే తెగ వెతికేస్తాడని.. అలాగే అ అనే వైవిధ్యభరితమైన చిత్రాన్ని అందిస్తున్నాడని అన్నాడు రాజమౌళి.