గురువుగారూ ఇదంతా మీ ట్రైనింగే: ప్రభాస్

'బాహుబలి' వంటి ఒక సినిమా రాజమౌళి చేయాలంటే, అందుకు హీరోగా ప్రభాస్ సహాయ సహకారాలు ఎంతో అవసరం. కొన్నేళ్లపాటు ప్రభాస్ మరో సినిమా చేయకుండా రాజమౌళికి అందుబాటులో ఉండుకుంటూ వచ్చాడు. అప్పటి నుంచి ఇద్దరి మధ్య ఎంతో సాన్నిహిత్యం ఏర్పడింది.

ఈ రోజున ప్రభాస్ కి ఈ స్థాయిలో పాన్ ఇండియా ఇమేజ్ రావడానికి కారకులు రాజమౌళి అనడంలో ఎలాంటి సందేహం లేదు. రాజమౌళి సినిమాలో ఏ హీరో చేసినా ఆ హీరోలు ఆయన ఫ్యామిలీలో ఒక భాగమైపోతారు. ఆయన పద్ధతుల పాఠశాలలో విద్యార్థులైపోతారు.

అలా రాజమౌళి - ప్రభాస్ మధ్య ఒక మంచి అనుబంధం ఉంది. అలాంటి రాజమౌళి 'రాధేశ్యామ్' సినిమాను గురించి ప్రభాస్ ను ఇంటర్వ్యూ చేస్తే ఈ సినిమాపై హైప్ మరింత పెరిగిపోవడం ఖాయం. తాజాగా ఈ సినిమా టీమ్ అదే పని చేసింది. ఇది ఇంటర్వ్యూ అనడం కంటే ఇద్దరి మధ్య జరిగిన సంభాషణ అంటే కరెక్టుగా ఉంటుంది.

ఈ సందర్భంలో రాజమౌళి మాట్లాడుతూ .. "నీకు చాలా బిడియం ఎక్కువ కదా? అలాంటిది 'రాధేశ్యామ్' సినిమా ప్రమోషన్స్ లో ఫుల్ బిజీగా తిరిగేస్తున్నావ్ .. మీడియాతో అదే పనిగా మాట్లాడేస్తున్నావ్? ఎలా సాధ్యం? అని ప్రభాస్ ను అడిగారు.

అందుకు ప్రభాస్ స్పందిస్తూ .. "నిజంగానే నాకు బిడియం ఎక్కువ .. దానిని పోగొట్టింది మీరే. 'బాహుబలి' సినిమా ప్రమోషన్స్ కోసం ముంబైలో మీరు ఒకే రోజున 40 ఇంటర్వ్యూలు ఇప్పించారు. ఎలా మాట్లాడాలనేది మీ నుంచే .. మీ ద్వారానే నాకు తెలిసింది. అప్పటి నుంచి కాస్త బెరుకు తగ్గి నేను చెప్పదలచుకున్న విషయాన్ని చెబుతూ వెళుతున్నాను. ఈ విషయంలో మీరే నాకు గురువుగారు" అంటూ చెప్పుకొచ్చాడు. నిజంగానే ఈ ఇంటర్వ్యూ ఈ సినిమాకి బాగా హెల్ప్ అవుతుందని చెప్పచ్చు.

ఇక ఒక వైపున 'ఆర్ ఆర్ ఆర్' కూడా ఈ నెల 25వ తేదీన థియేటర్లకు రానుంది. 'రాధేశ్యామ్' తరువాత టాలీవుడ్ నుంచి వెళుతున్న మరో భారీ సినిమా ఇది. ఆ సినిమా ప్రమోషన్స్ కి అవసరమైన సన్నాహాలు చేసుకుంటూనే, రాజమౌళి ఈ సినిమా ప్రమోషన్స్ కి రావడం ఆయన మంచి మనసుకు నిదర్శనం. ప్రభాస్ పట్ల ఆయనకి గల ప్రేమాభిమానాలకు ఉదాహరణ. ఇక ఒకే నెలలో ప్రపంచవ్యాప్తంగా ప్రేక్షకుల ముందుకు వస్తున్న ఈ సినిమాలు ఏ స్థాయిలో సంచలనాలు సృష్టిస్తాయనేది చూడాలి.