గుణశేఖర్ కోసం జక్కన్న బ్యాటింగ్

‘రుద్రమదేవి’ కోసం గుణశేఖర్ ఎంత కష్టపడ్డాడో అందరికీ తెలుసు. తన ఆస్తులన్నింటినీ తాకట్టు పెట్టి మరీ ఈ సినిమా పూర్తి చేశాడు గుణ. బహుశా తెలుగులో ఏ దర్శకుడు కూడా ఇంత పెద్ద సాహసం చేసి ఉండడు. గుణ ఎంత రిస్క్ చేశాడో సామాన్య ప్రేక్షకులు కూడా అర్థం చేసుకున్నారు. అందుకే ఈ సినిమాకు మంచి జరగాలని ప్రతి ఒక్కరూ కోరుకుంటున్నారు. తన సినిమాలే కాకుండా వేరే సినిమాలు కూడా బాగా ఆడాలని కోరుకునే రాజమౌళి సైతం ఈ సినిమాకు మద్దతుగా తనవంతు ప్రచారం చేస్తున్నాడు. ఇప్పటికే ‘రుద్రమదేవి’కి మద్దతుగా ట్వీట్లు చేశాడు జక్కన్న.

తాజాగా ‘రుద్రమదేవి’కి తెలంగాణ ప్రభుత్వం పన్ను మినహాయింపు ఇవ్వడంపై హర్షం వ్యక్తం చేస్తూ ట్వీట్లు చేశాడు రాజమౌళి. అంతే కాదు.. ఆంధ్రప్రదేశ్ ప్రభుత్వం కూడా ఈ సినిమాకు పన్ను మినహాయింపు ఇవ్వాలని విజ్నప్తి చేశాడతను. ‘‘రుద్రమదేవి సినిమాకు పన్ను మినహాయింపు దక్కిందని తెలిసి చాలా సంతోషంగా ఉంది. ఇది గొప్ప వార్త. గుణశేఖర్ గారు ఏటికి ఎదురీదుతున్నారు. చాలా రోజుల నుంచి ఈ ఎపిక్ మూవీని ప్రేక్షకుల ముందుకు తేవడానికి ప్రయత్నిస్తున్నారు. రుద్రమదేవి తెలుగు గడ్డ మీద పుట్టిన వీరనారి. ఆంధ్రప్రదేశ్ ప్రభుత్వం కూడా ఈ సినిమాకు పన్ను మినహాయింపు ఇస్తుందని ఆశిస్తున్నా. రుద్రమదేవి టీమ్ మొత్తానికి ఆల్ ద బెస్ట్’’ అని ట్వీట్ చేశాడు జక్కన్న. ఓ పెద్ద దర్శకుడు మరో సినిమాను గట్టెక్కించడానికి తన వంతుగా ఇలాంటి ప్రయత్నం చేయడం గొప్ప విషయం.