కాస్త‌ ముందు ట్వీట్ చేసి ఉండొచ్చుగా జ‌క్క‌న్నా!

టాలీవుడ్ లో పెద్ద మార్పు వ‌చ్చేసింది. అంద‌రూ అంద‌ర్ని మెచ్చుకోవ‌టం. ఆల్ ఈజ్ వెల్ అంటూ అప్పుడెప్పుడో వ‌చ్చిన సూప‌ర్ డూప‌ర్ సినిమాలోని మాట‌ను ఇప్పుడు టాలీవుడ్ జ‌పిస్తుంద‌ని చెప్పాలి. సినిమా ఎవ‌రిదైనా కావొచ్చు.. వారి టీజ‌ర్ కావొచ్చు.. ట్రైల‌ర్ కావొచ్చు.. సినిమా కావొచ్చు.. వెంట‌నే స్పందించటం.. దాన్ని బాగుంద‌న‌టం.. మ‌రికొన్నిసార్లు ఆకాశానికి ఎత్తేయ‌టం ఈ మ‌ధ్య‌న మొద‌లైన కొత్త ట్రెండ్ గా చెప్పాలి.

నిజానికి ఈ అల‌వాటుకు క‌ర్త‌..క‌ర్మ‌.. క్రియ‌.. జ‌క్క‌న్న అని చెప్పాలి. కొత్త త‌రాన్ని ప్రోత్సాహించాల‌నో.. టాలెంట్‌కు మ‌రింతగా ఉత్సాహాప‌ర్చాల‌నుకుంటారో కానీ.. కొత్త సినిమాకు సంబంధించి పాజిటివ్ గా రియాక్ట్ కావ‌టం జ‌క్క‌న్న‌లో క‌నిపిస్తుంది. ఆయ‌న పుణ్య‌మా ప‌లు చిన్న సినిమాలు కొత్త ఉత్సాహంతో క‌లెక్ష‌న్లు పిండేసుకోవ‌టం కూడా చూసిందే. జ‌క్క‌న్న మొద‌లెట్టిన ఈ అల‌వాటును అంద‌రూ ఇప్పుడు వంట ప‌ట్టించుకుంటున్నారు.

గ‌తంలో మాదిరి ఈగోల‌ను ప‌క్క‌న పెట్టేసి.. అంద‌ర్ని అంద‌రూ త‌లో చేయి వేసి పైకి లాగ‌టం అల‌వాటుగా మారిన వేళ‌.. తాజాగా ఆనందో బ్ర‌హ్మ సినిమా మీద జ‌క్క‌న్న ప్ర‌శంస‌ల జ‌ల్లు కురిపించారు. ఈ సినిమాను చాలా బాగా రాశార‌ని.. చ‌క్క‌గా చూపించార‌ని పొగిడేశాడు. సినిమా అద్భుతంగా ఉంద‌ని.. త‌న‌కెంతో న‌చ్చింద‌న్న రాజ‌మౌలి.. రాజీవ్ క‌న‌కాల న‌టన ఎంతో బాగుంద‌న్నారు. ఆనందో బ్ర‌హ్మ టీంకు అభినంద‌న‌లు అంటూ ట్విట్ట‌ర్ లో ట్వీట్ చేశాడు.

నిజానికి ఆనందో బ్ర‌హ్మ ఊహించిన దాని కంటే బాక్సాఫీస్ ద‌గ్గ‌ర మంచి వ‌సూళ్లు రాబ‌ట్ట‌టం.. పాజిటివ్ టాక్ తో దూసుకెళ్ల‌టం తెలిసిందే. ఆగ‌స్టు 18న విడుద‌లైన ఈ మూవీ మొద‌టి వీకెండ్‌ లోనే భారీ వ‌సూళ్లు సాధించి.. చిన్న సినిమాకు పెద్ద వ‌సూళ్లు సాధించిన సినిమాగా నిలిచింది. ఇదే త‌ర‌హా ప్ర‌శంస విడుద‌లైన వెంట‌నే రాజ‌మౌళి కానీ ఇచ్చి ఉంటే.. వ‌సూళ్లు మ‌రింత పెరిగేవ‌న్న అభిప్రాయం వ్య‌క్త‌మ‌వుతోంది.