సీక్వెల్‌ ను ప్రకటించిన హీరో

యాంగ్రీ యంగ్‌ మన్‌ రాజశేఖర్‌ దాదాపు దశాబ్ద కాలం తర్వాత 'గరుడవేగ' చిత్రంతో ఒక మోస్తరు సక్సెస్‌ ను దక్కించుకున్నాడు. ఆ సినిమా సక్సెస్‌ తో రాజశేఖర్‌ లో పునరోత్తేజం వచ్చినట్లుగా ఉంది. గరుడవేగ చిత్రం తర్వాత చాలా స్పీడ్‌ గా సినిమాలను చేసేందుకు ప్రయత్నాలు చేస్తున్నాడు. గరుడవేగ వచ్చి పోయిన వెంటనే 'కల్కి' చిత్రాన్ని మొదలు పెట్టిన రాజశేఖర్‌ త్వరలో ఈ చిత్రాన్ని కూడా ప్రేక్షకుల ముందుకు తీసుకు వచ్చేందుకు సిద్దం అయ్యాడు.

ప్రశాంత్‌ వర్మ దర్శకత్వంలో తెరకెక్కిన 'కల్కి' చిత్రాన్ని సి కళ్యాణ్‌ నిర్మించాడు. భారీ అంచనాల నడుమ విడుదల కాబోతున్న ఈ చిత్రం ప్రమోషన్‌ లో భాగంగా రాజశేఖర్‌ తాజాగా మీడియాతో మాట్లాడుతూ పలు ఆసక్తికర విషయాలను వెళ్లడించాడు. తన తదుపరి చిత్రం విషయంపై కూడా రాజశేఖర్‌ క్లారిటీ ఇచ్చాడు. అప్పట్లో నాకు ఎక్కువ సక్సెస్‌ లు ఇచ్చిన దర్శకులు కోడి రామకృష్ణ.. ముత్యాల సుబ్బయ్య మరియు రవిరాజా పినిశెట్టి. ఇప్పుడు అలాంటి దర్శకులే నాకు ప్రశాంత్‌ వర్మ మరియు ప్రవీణ్‌ సత్తారు రూపంలో లభించారు. నేను కమర్షియల్‌ గా ఇబ్బందుల్లో ఉన్న సమయంలో అప్పుడు వారు నన్ను లేపేవారు. ఇప్పుడు వీరిద్దరు నా కెరీర్‌ ను మరోసారి లేపుతున్నారు.

వీరిద్దరితో మళ్లీ మళ్లీ సినిమాలు చేయాలని కోరుకుంటున్నట్లుగా చెప్పుకొచ్చాడు. కల్కి సినిమాను నిర్మాత చూసి చాలా సంతోషంగా ఉన్నాడు. నేను సినిమాను చూడలేదు. నా పిల్లలు కూడా చూసి చాలా బాగుందంటున్నారు. తప్పకుండా కల్కి సినిమా ఆకట్టుకునే విధంగా ఉంటుందని నమ్మకంగా ఉన్నాను అన్నాడు. ఇక తన తదుపరి చిత్రం గురించి మాట్లాడుతూ.. గరుడవేగ 2 చిత్రాన్ని తాను చేయబోతున్నట్లుగా పేర్కొన్నాడు. ప్రవీణ్‌ సత్తార్‌ అందుకోసం స్క్రిప్ట్‌ పనిలో ఉన్నాడని తెలుస్తోంది. గరుడవేగ చిత్రం మంచి విజయాన్ని సొంతం చేసుకున్న నేపథ్యంలో అదే కథను కొనసాగించి ముందుకు వెళ్లాలా లేదంటే ఏదైనా కొత్త స్టోరీ లైన్‌ వెదకాలా అంటూ చర్చలు జరుగుతున్నట్లుగా తెలుస్తోంది. మొత్తానికి రాజశేఖర్‌ తదుపరి చిత్రం మాత్రం 'గరుడవేగ 2' అని తేలిపోయింది.