టాక్ బ్లాక్ బస్టరే కానీ వసూళ్లు చూస్తే..

కొన్నిసార్లు టాక్ అంత గొప్పగా లేకున్నప్పటికీ వసూళ్లు అదిరిపోతుంటాయి. కానీ కొన్నిసార్లు చాలా మంచి టాక్ వచ్చినా వసూళ్లు అంత గొప్పగా ఉండవు. ‘గరుడవేగ’ సినిమా రెండో కోవకే చెందుతుంది. రెండు వారాల కిందట విడుదలైన ఈ సినిమాకు ఈ సినిమాకు అన్ని వైపులా ప్రశంసలు దక్కాయి. రివ్యూలు పాజిటివ్ గా వచ్చాయి. ప్రేక్షకులూ ఈ సినిమాను ప్రశంసించారు. సోషల్ మీడియాలో కూడా పాజిటివ్ టాక్ బాగా స్ప్రెడ్ అయింది. మొదట్లో పబ్లిసిటీ కూడా బాగానే చేసినట్లు కనిపించారు. కానీ అన్ని సానుకూలతలూ ఉన్నప్పటికీ ఈ సినిమాకు ఆశించిన స్థాయిలో వసూళ్లు రాలేదు. రెండు వారాల్లో కలిపి ఈ చిత్రం ప్రపంచవ్యాప్తంగా రూ.7 కోట్ల షేర్ మాత్రమే వసూలు చేసింది.

ఈ సినిమా బడ్జెట్.. దీనికి వచ్చిన టాక్ ప్రకారం చూస్తే ఈ వసూళ్లు చాలా తక్కువనే చెప్పాలి. ఈ ఏడు కోట్లలో కూడా అమెరికా షేర్ రూ.1.5 కోట్లు ఉండటం గమనార్హం. మిగతా ఔట్ సైడ్ ఏరియాలు కూడా తీసేస్తే.. తెలుగు రాష్ట్రాల్లో ఈ చిత్రం రూ.5 కోట్ల షేర్ మాత్రమే రాబట్టినట్లు లెక్క. రూ.25-30 కోట్ల మధ్య ఈ చిత్రానికి బడ్జెట్ పెట్టినట్లు చెప్పుకున్నారు. ఆ బడ్జెట్లో తెరకెక్కే సినిమాలకు ఒకట్రెండు రోజుల్లోనే రూ.5 కోట్ల షేర్ వచ్చేస్తుంటుంది. కానీ ప్రి రిలీజ్ బజ్ లేకపోవడం.. రాజశేఖర్ మార్కెట్ బాగా దెబ్బ తినేసి ఉండటం.. ఈ చిత్రానికి సరైన సంఖ్యలో, మంచి థియేటర్లు దొరక్కపోవడం మైనస్ అయింది. మొత్తానికి పోస్టర్ మీద బ్లాక్ బస్టర్ బ్లాక్ బస్టర్ అని వేస్తున్నారు కానీ.. అది టాక్ వరకు పరిమితమైంది. వసూళ్ల కోణంలో చూస్తే ఈ సినిమా ఫ్లాప్ అనే చెప్పాలి.