పాపం రాజశేఖర్

‘గరుడ వేగ’ సినిమాతో చాలా ఏళ్ల తర్వాత మళ్లీ తన ఉనికిని చాటుకున్నాడు సీనియర్ హీరో రాజశేఖర్. ఈ సినిమా ఆర్థికంగా ఆయనకు అంత గొప్ప ఫలితాన్నేమీ ఇవ్వకపోయినప్పటికీ.. మళ్లీ ఆయన గురించి జనాలు మాట్లాడుకునేలా చేసింది. మళ్లీ రాజశేఖర్ సినిమా చూసేందుకు జనాల్ని థియేటర్లకు రప్పించింది. ఈ సినిమా రాజశేఖర్ కెరీర్ కు మంచి ఊపునిస్తుందని.. మంచి అవకాశాలు తెచ్చిపెడుతుందని కూడా అంతా అనుకున్నారు. కానీ ప్రస్తుతం పరిస్థితి చూస్తుంటే అలాంటి సంకేతాలేమీ కనిపించడం లేదు. ‘అ!’తో సత్తా చాటుకున్న యువ దర్శకుడు ప్రశాంత్ వర్మతో రాజశేఖర్ ఓ సినిమా చేయబోతున్నాడని వార్తలొచ్చాయి. అలాగే రామ్ హీరోగా ప్రవీణ్ సత్తారు తీయబోయే చిత్రంలోనూ ఓ కీలక పాత్ర పోషిస్తాడని అన్నారు. కానీ ఈ రెండు సినిమాలూ పట్టాలెక్కలేదు.

ప్రశాంత్ వర్మ ఉన్నట్లుండి ‘క్వీన్’ రీమేక్ వైపు వెళ్లిపోయాడు. రాజశేఖర్ తో అతడి సినిమా అసలు ఓకే అయిందో లేదో కూడా తెలియదు. ఇక రామ్ సినిమా బడ్జెట్ సమస్యలతో ఆగిపోయింది. అది కూడా ముందుకు కదిలేలా లేదు. మరోవైపు సౌందర్య రజినీకాంత్.. రాజశేఖర్ తో ఓ సినిమా చేయబోతున్నట్లు వచ్చిన వార్తల్లో నిజమెంతో తెలియదు. ‘గరుడ వేగ’ వచ్చి ఆరు నెలలు దాటినా ఇప్పటి వరకు రాజశేఖర్ మరో సినిమా ఓకే చేయకపోవడం.. ఖాళీగానే ఉండటం ఆశ్చర్యం కలిగించే విషయమే. కొన్ని రోజులు ఇలాగే కొనసాగితే మళ్లీ ఆయన్ని అందరూ మరిచిపోతారు. కమ్ బ్యాక్ కోసం మళ్లీ ఆయన సొంతంగా ఇంకో సినిమా ఏదైనా మొదలుపెట్టాల్సి ఉంటుంది. కానీ ప్రతిసారీ ‘గరుడ వేగ’ మ్యాజిక్ రిపీటవుతుందన్న గ్యారెంటీ ఉండదు. మరి మున్ముందు ఆయన కెరీర్ ఎలా సాగుతుందో చూడాలి.