'మా' ఎన్నికల గురించి అడిగితే.. రాజేంద్రప్రసాద్ షాకింగ్ వ్యాఖ్య

రెండు తెలుగు రాష్ట్రాలే కాదు.. ప్రపంచంలోని ప్రతి మూలన ఉన్న తెలుగువారు సైతం ఆసక్తిని ప్రదర్శించేలా చేశాయి 'మా' ఎన్నికలు. తిప్పి కొడితే వెయ్యి మంది కూడా ఉండని ఈ ఎన్నికల మీద అంత ఆసక్తి వ్యక్తం కావటానికి కారణం.. ఈ ఎన్నిక మొత్తం సినిమా తారల మధ్యనే జరుగుతుండటమే కారణం. దీనికి తోడు.. తెలుగు సినిమా ఇండస్ట్రీ రెండుగా చీలినట్లుగా కనిపించిన ఈ ఎన్నికలు హాట్ టాపిక్ గా మారాయి.

ఎన్నికలు ముగిసి.. ఫలితాలు వెల్లడై.. విజేతలుగా ఎవరన్నది తేలిపోయిన తర్వాత కూడా.. ఆ ఎన్నికల ప్రకంపనలు ఇంకా సాగుతూనే ఉన్నాయి. తాజాగా అలాంటి పరిస్థితే సీనియర్ నటుడు కమ్ నట కిరిటీకి పేరున్న రాజేంద్రప్రసాద్ కు ఎదురైంది. ఆయన పశ్చిమగోదావరి జిల్లా ద్వారకా తిరుమలకు వచ్చారు. చిన్న తిరుపతిగా ఫేమస్ అయిన ఈ పుణ్యక్షేత్రంలో చిన వెంకన్నను దర్శించుకున్నారు. ఫ్యామిలీతో పాటు వచ్చిన ఆయన.. కాసేపు మీడియాతో మాట్లాడారు.

ఈ సందర్భంగా 'మా' ఎన్నికల గురించిన ప్రశ్నల్ని రిపోర్టర్లు వేసినంతనే.. తాను నటించిన 'ఆ ఒక్కటి అడక్కు' సినిమా పేరును చెప్పి.. సమాధానం చెప్పేందుకు నిరాకరించారు. ఆ ఒక్కటి కాకుండా మరేదైనా అడగాలన్న కండీషన్ పెట్టి మరీ.. సమాధానాలు చెప్పుకొచ్చారు. ఇప్పుడున్న పరిస్థితుల్లో 'మా' ఎన్నికల వ్యవహారంపై మాట్లాడేందుకు సైతం విముఖత ఎంతలా వ్యక్తమవుతుందో ఈ ఉదంతం చెప్పేస్తుందన్న మాట వినిపిస్తోంది.