చోరీ చేసేలోపే వడ్డించేసిన రాజేంద్రుడు

నట కిరీటిగా నవ్వులు పంచే రాజేంద్ర ప్రసాద్.. సినిమాలో ఉంటే ఎన్నో నవ్వులు పండుతాయి. ఆన్ స్క్రీన్ పైనే కాదు.. ఆఫ్ స్క్రీన్ లోనూ బోలెడన్ని నవ్వులు పండించగల హాస్య చతురత ఆయన సొంతం. నవ్వించడమే కాదు.. ఆయన దగ్గర మరో బ్రహ్మాండమైన విద్య కూడా ఉందట. నిర్మాత అనిల్ సుంకర తాజాగా ఈ విషయాన్ని ఫోటోలతో సహా చూపించేశాడు.

రాజేంద్ర ప్రసాద్ తో కలిసి రాజ్ తరుణ్ నటిస్తున్న మూవీ రాజుగాడు. ఈ చిత్రాన్ని సంక్రాంతి రేసులో నిలిపినట్లు ఇప్పటికే మేకర్స్ అనౌన్స్ చేశారు. సంజనా రెడ్డి దర్శకత్వంలో రూపొందుతున్న ఈ చిత్రంపై ఎక్స్ పెక్టేషన్స్ ఎక్కువగానే ఉన్నాయి. ఈ షూటింగ్ స్పాట్ కు సంబంధించిన కొన్ని ఫోటోలను నిర్మాత అనిల్ సుంకర.. సోషల్ మీడియాలో పోస్ట్ చేశాడు. మోకాళ్ల పైకి నిక్కర్ వేసుకుని.. దానిపైన లుంగీ కట్టి వంట వండుతున్న రాజేంద్ర ప్రసాద్ తో పాటు.. పక్కనే నుంచుని సీరియస్ గా చూస్తూ.. ఏదో మాట్లాడుతున్న రాజ్ తరుణ్ ఈ ఫోటోల్లో కనిపిస్తాడు.

'రాజేంద్ర ప్రసాద్ గారు షూటింగ్ స్పాట్ లో ఉంటే నవ్వులకే కాదు.. ఫుడ్ కి కూడా లోటు ఉండదు. ఆయన కష్టపడి ఫుడ్ ప్రిపేర్ చేస్తుంటే.. దాన్ని ఎలా కొట్టేయాలా అని రాజ్ తరుణ్ చూస్తున్నాడు' అని అనిల్ సుంకర కామెంట్ పెట్టగా.. 'నేను ఆహారాన్ని చోరీ చేయాలని ట్రై చేసేలోపే వడ్డించేశారు. రాజేంద్ర ప్రసాద్ గారి లాంటి యాక్టర్ తో నటించడం నా అదృష్టం' అంటూ రాజ్ తరుణ్ రిప్లై ఇవ్వడం విశేషం.