ఫోటో స్టోరి: కాలా తొక్కేయ‌డం ఖాయం

కాలా కోసం ర‌జినీ ఫ్యాన్స్ కాచుకుని కూర్చున్నారు. ఇదిగో విడుద‌ల అదిగో విడుద‌ల అంటూ నెల‌లు గ‌డిచిపోతున్నాయ్ కానీ ఆ సినిమా విడుద‌ల కాలేదు. మే 9 ఆడియో రిలీజ్ వేడుక కూడా ఏర్పాటు చేశారు. క‌నుక జూన్‌లో విడుద‌లైపోతుంద‌న్న న‌మ్మ‌కంతో ఉన్న అభిమానులు. వారి అభిమానం ఎంత‌గా పెరిగిందంటే... కాలా వ‌చ్చి ఎవెంజ‌ర్స్ ను తొక్కేయ‌డం ఖాయం అంటున్నారు.

హాలీవుడ్ సినిమా ఎవెంజ‌ర్స్ ఇలా థియ‌ట‌ర్ల‌లోకి వ‌చ్చిందో లేదో సొంత భాషా చిత్రాల‌ను కూడా ప‌క్క‌నపెట్టి ఆ సినిమాకే వెళుతున్నారు సినీ జ‌నాలు. అందులోనూ సూప‌ర్ హీరోల సినిమా కావ‌డంతో థియేట‌ర్లు కిట‌కిట లాడేస్తున్నాయి. దీంతో ఎవెంజ‌ర్స్ వచ్చి అన్ని సినిమాల‌ను తొక్కేసింద‌న్న వార్త‌లు వ‌స్తున్నాయ్‌. దీనికి కౌంట‌ర్ పేల్చారు ర‌జినీ అభిమానులు. సూప‌ర్ హీరోలంద‌రినీ కింద ప‌డిపోయి ఉండ‌గా... వారిపై ర‌జినీ కాంత్ నిల్చున్న బొమ్మ‌ను ఫోటో తీసి సోష‌ల్ మీడియాలో పెట్టారు. కాలా వ‌చ్చి ఎవెంజ‌ర్స్‌ను తొక్కేస్తాడ‌న్న‌ది వారి అభిప్రాయం. ఆ ఫోటో వైర‌ల్ అవుతోంది. అంతేకాదు సినీ అభిమానుల‌కు ఇంట్రెస్టింగ్‌గా మారింది.

రజనీకాంత్‌ హీరోగా లైకా ప్రొడక్షన్స్‌ - వండర్‌ బార్‌ ఫిలింస్‌ ప్రై. లిమిటెడ్‌ పతాకాలపై ధనుష్‌ నిర్మిస్తున్న చిత్రం 'కాలా. దీని ద‌ర్శ‌కుడు పా రంజిత్‌. ఇప్ప‌టికే ఆ సినిమాకు సంబంధించి ట్రైల‌ర్ అభిమానుల‌కు తెగ‌న‌చ్చేసింది. ఈ సినిమాలో ర‌జినీ గ్యాంగ్‌స్ట‌ర్‌గా క‌నిపించ‌నున్నాడు. మురికి వాడ‌ల నేప‌థ్యంలో సినిమా క‌థ సాగుతుంది. ఈ సినిమా శాటిలైట్ హ‌క్కులు భారీగా 75 కోట్ల రూపాయ‌ల‌కు అమ్మిన‌ట్టు స‌మాచారం. అంటే మేకింగ్ ఖ‌ర్చంతా వెన‌క్కి వ‌చ్చేసిన‌ట్టే. సినిమా విడుద‌ల‌య్యాక వ‌చ్చేదంతా నిర్మాత‌ల‌కు లాభమేన‌న్న మాట‌.