కాలా ముందుకు... ఆ సినిమా వెనక్కి?

వెండితెరపై సూపర్ స్టార్ రజనీకాంత్ నట విశ్వరూపం 2.0లో చూడొచ్చనే ఆశతో అభిమానులు చాలారోజులుగా ఉత్కంఠగా ఎదురుచూస్తున్నారు. భారత దేశంలోనే అత్యంత భారీ బడ్జెట్ తో శంకర్ డైరెక్ట్ చేసిన సినిమా కావడంతో ఈ సినిమాపై చాలా అంచనాలే ఉన్నాయి. కానీ 2.0 రిలీజ్ ఒకడుగు ముందుకేస్తే.. మూడడుగులు వెనక్కు పోతున్నట్టుగా అవుతోంది.

2.0 కచ్చితంగా ఎప్పుడు రిలీజ్ అవుతుందనే దానిపై దర్శకుడు శంకర్ కానీ.. సినిమా తీస్తున్న లైకా ప్రొడక్షన్స్ కానీ ఇంతవరకు ఎలాంటి క్లారిటీ ఇవ్వలేదు. నిన్న మొన్నటిదాకా ఈ సినిమా ఏప్రిల్ 14న వస్తుందని కోలీవుడ్ లో న్యూస్ వినిపించింది. 2.0తో పాటే రజనీకాంత్ కబాలి ఫేం పా.రంజిత్ దర్శకత్వంలో కాలా సినిమా చేశాడు. ఈ సినిమా షూటింగ్ దాదాపుగా పూర్తయిపోయింది. దీనిని కూడా 2.0 తీసిన లైకా ప్రొడక్షన్సే నిర్మించింది. ముందు 2.0 వస్తుందని.. ఆ తరవాత కాలా ప్రేక్షకుల ముందుకు వస్తుందని మేకర్స్ ముందు నుంచి చెప్పుకుంటూ వస్తున్నారు. కానీ కాలాయే ముందుగా థియేటర్లకు వస్తుందనేది కోలీవుడ్ లో వినిపిస్తున్న లేటెస్ట్ న్యూస్.

శంకర్ 2.0కు అన్ని హంగులు తీర్చిదిద్దడం ఏప్రిల్ 14 నాటికి కంప్లీట్ అయ్యే అవకాశాలు లేకపోవడంతోనే లైకా ప్రొడక్షన్స్ అప్పుడు కాలీ రిలీజ్ చేయాలనే ఆలోచన చేస్తోందని తెలుస్తోంది. ఎందుకంటే అప్పటికి తమిళవాళ్లకు కొత్త సంవత్సరం ప్రారంభం కావడంతో పాటు సమ్మర్ సీజన్ కూడా ప్రారంభం అవుతుంది. ఈ సీజన్ మిస్సవకూడదనే కాలాను ముందుకు తెరపైకి తీసుకొస్తున్నారు.