కాలాకూ తప్పని కాపీ గోల

సూపర్ స్టార్ రజనీకాంత్ ఈ సమ్మర్ కు 2.0 సినిమాతో మొత్తం సౌత్ ప్రేక్షకులను పలకరించాలని ప్లాన్ చేసుకున్నాడు. కానీ గ్రాఫిక్ వర్క్ పూర్తి కాకపోవడంతో 2.0 రిలీజ్ సుదీర్ఘంగా వాయిదా పడింది. దానికన్నా వెనుక మొదలెట్టిన కాలా షూటింగ్ దాదాపుగా పూర్తి కావడంతో ఆ సినిమా నిర్మాత.. రజనీకాంత్ అల్లుడు ధనుష్ వెంటనే ప్లాన్ మార్చేశాడు. 2.0 రిలీజ్ టైంకే కాలాను థియేటర్లకు తీసుకొస్తున్నట్లు చెప్పేశాడు.

ఇప్పటికే ఫస్ట్ లుక్ వచ్చిన కాలా సినిమా టీజర్ మార్చి 1కి రిలీజ్ చేస్తామని ధనుష్ ముందు అనౌన్స్ చేశాడు. ఈలోగా కాలా టీజర్ లీక్ అంటూ నెట్ లో ఓ వీడియో ప్రత్యక్షమైంది. అందులో రజనీ కనిపించకపోయినా మాస్ లీడర్ గా ఎలా శాసిస్తాడు సూపర్ స్టయిలిష్ గా చూపించారు. ఇదిచూసి అభిమానులంతా తెగ ముచ్చట పడిపోయారు. కానీ కొద్దిసేపటికే అది కాలా టీజరే కాదని కొందరు పసిగట్టేశారు కన్నడ స్టార్ హీరో శివరాజ్ కుమార్ హీరోగా నటిస్తున్న ముఫ్తి ట్రైలర్ లోని సీన్లను తీసుకొచ్చి ఎడిట్ చేసి కాలా టీజర్ గా బిల్డప్ ఇచ్చి నెట్ లోకి వదిలారు.

తాజాగా కాలా టీజర్ మార్చి 1కి బదులు ఒకరోజు వాయిదా వేస్తున్నట్లు ధనుష్ స్టేట్ మెంట్ ఇచ్చాడు. తమిళనాడులోని కంచి కామకోటి పీఠాధిపతి జయేంద్ర సరస్వతి హఠాన్మరణం నేపథ్యంలో 1న రిలీజ్ చేయడం లేదని ప్రకటించాడు. కబాలి ఫేం పా. రంజిత్ దర్శకత్వంలో తెరకెక్కిన కాలా ఏప్రిల్ 27న థియేటర్లకు రానుంది. బాలీవుడ్ బ్యూటీ హ్యూమా ఖురేషీ ఇందులో హీరోయిన్ గా నటించింది.