కబాలి మతిపోగొట్టేస్తున్నాడబ్బా..

కబాలి పోస్టర్లు చూసి.. అందులో రజినీకాంత్ లుక్స్ చూసి.. ఇప్పటికి జనాలు ఎన్నిసార్లు వావ్ అనుకున్నారో లెక్కలేదు. సినిమా మొదలవ్వడానికి ముందు.. రజినీ గొలుసుతో విలన్లందరి భరతం పడుతున్నట్లుగా డిజైన్ చేసిన ఫస్ట్ లుక్ పోస్టర్ మొదలుకుని.. ‘కబాలి’ బృందం విడుదల చేస్తున్న ప్రతి పోస్టరూ జనాలకు పిచ్చెక్కించేస్తోంది. ఈ మధ్యే రిలీజ్ డేట్ కన్ఫమ్ చేస్తూ రజినీ గుండెల్లో రాధిక ఉన్నట్లుగా డిజైన్ ఓ పోస్టర్ చూసి దిమ్మదిరిగిపోయింది. రజినీ సినిమాలంటే తెరనే కాదు.. పోస్టర్లను కూడా ఆయనే ఆక్రమించేస్తారు. అలాంటిది.. హీరోయిన్ కు అంత ప్రాధాన్యం కల్పిస్తూ.. ఓ గాఢమైన ప్రేమకథ కోసం అన్నట్లు డిజైన్ చేసిన ఆ పోస్టర్ చూసి ఔరా అనుకున్నారంతా.

ఇక లేటెస్టుగా రిలీజ్ చేసిన పోస్టర్ ‘కబాలి’ టీం క్రియేటివిటీకి మరోసారి సలాం కొట్టేలా చేస్తోంది. గన్ను ట్రిగ్గర్ దగ్గర రజినీ తల పెట్టి నొక్కుకుపోతున్నట్లుగా ఈ కొత్త పోస్టర్ తీర్చిదిద్దారు. ఓ గ్యాంగ్ స్టర్ జీవితం ఎలా ఉంటుంది.. తాను ఎంచుకున్న బాటలో హీరో ఎలాంటి ఒడుదొడుకులకు లోనవుతాడు అన్నదానికి ఈ పోస్టర్ ఇండికేషన్ లాగా కనిపిస్తోంది. ఇంకా రజినీ ఓ చిన్నారిని ఎత్తుకుని మురిసిపోతున్న పోస్టర్.. రజినీ-రాధికల మీదికి బుల్లెట్ దూసుకెళ్తున్న మరో పోస్టర్.. ఇలా ప్రతిదీ వావ్ అనిపిస్తూనే ఉంది. సినిమాలో ఏముందో కానీ.. పోస్టర్లలో మాత్రం చాలా ఇంటెన్సిటీ కనిపిస్తోంది. మొత్తానికి ‘కబాలి’ పోస్టర్లు ఎవరు డిజైన్ చేస్తున్నారో కానీ.. వాళ్లకు సలాం కొట్టాల్సిందే.