బాహుబలి రూట్లోనే కబాలి వారు కూడా..

ఇప్పటివరకు బాహుబలి సినిమాకు వచ్చినంత క్రేజ్.. ఆ తరువాత వచ్చింది కేవలం కబాలి సినిమాకే అనే చెప్పాలి. అసలే రజనీకాంత్‌ సినిమా.. పైగా ట్రైలర్ అదిరిపోయింది.. విమానాల మీద పోస్టర్లు వేశారు.. రజనీ ముఖంతో కవర్‌ చేసిన సిమ్ములు అమ్ముతున్నారు.. దానికితోడు పాటలు బాగున్నాయి.. ముసలి గెటప్ లో గురువుగారు రెచ్చిపోయారు.. చూస్కోండి మరి హైప్‌ ఎలా ఉంటుందో.

రిలీజ్ రోజున దాదాపు 5000 స్ర్కీన్లలో ఇండియాలో రిలీజవుతోంది కబాలి సినిమా. తెలుగు - తమిళంతో పాటు.. హిందీలో కూడా సినిమా వస్తోంది. ఇలాంటప్పుడు మేకర్లు ఇంకా ఎక్కువ జాగ్రత్త పడాలి. ఎక్కవ ధియేటర్లలో వస్తున్నప్పుడు.. ఎక్కడన్నా మారుమూల పల్లెల్లో.. ముఖ్యంగా తమిళనాడులో.. ఈ పైరసీ ముఠాలు రెచ్చిపోయే ఛాన్సుంది. అందుకే అప్పట్లో బాహుబలి వారు ఎలాగైతే హైకోర్టు నుండి జాన్-డో అనే ఇంజక్షన్‌ ఆర్డర్ తీసుకున్నారు ఇప్పుడు కబాలి కూడా అదే తీసుకోబోతోందట. ఆల్రెడీ గవర్నమెంటు చాలావరకు టొరెంట్ సైట్లను బ్లాక్‌ చేయగా.. ఇంకా ఏమన్నా ఉంటే.. తెలిసిన వాటిని తెలిసిన వెంటనే బ్లాకు చేసేట్లు సైబర్ క్రయిమ్ వారికి ఆదేశాలు జారీచేయమని కోర్టును ఎప్రోచ్ అయ్యారు కబాలి వారు.

మొత్తానికి బాహుబలి చూపించిన దారిలోనే నడిచి.. రిలీజైన రెండు వారాల్లో కలక్షన్లతో హోరెత్తించాలని కబాలి టీమ్ చూస్తోంది. పా రంజిత్‌ రూపొందించిన ఈ సినిమా.. జూలై 22న విడుదలవుతున్న సంగతి తెలిసిందే.