రజినీకాంత్ మొత్తం మార్చేశాడే..

‘కబాలి’ సినిమాకు సంబంధించి సూపర్ స్టార్ రజినీకాంత్ స్టైలిష్ లుక్స్ ఇప్పటికే అభిమానుల్లో ఉత్సాహం నింపాయి. ఏజ్ బార్ అయిన డాన్ గా ఆయన గెటప్ అదుర్స్ అన్న ఫీడ్ బ్యాక్ వచ్చింది. తెల్లటి జుట్టు - గడ్డంలోనూ ఎంతో స్టైలిష్ గా కనిపించాడు సూపర్ స్టార్. ఐతే ‘కబాలి’ సినిమా అంతా కూడా ఇలాగే గడ్డంతో కనిపిస్తాడని అంతా అనుకున్నారు. కానీ రజినీ ఇప్పుడు గడ్డం తీసేసి నున్నటి షేవింగ్ తో దర్శనమిస్తున్నాడు. ఆ గెటప్ రోబో-2 కోసం ఏమో అనుకోకండి. రోబో-2 ఫస్ట్ షెడ్యూల్ అవగానే.. దాని నుంచి బ్రేక్ తీసుకుని మళ్లీ ‘కబాలి’ ఫైనల్ షెడ్యూల్ షూటింగ్ కోసం మలేషియాకు షిఫ్ట్ అయిపోయాడు రజినీ.

అక్కడ మలేషియాలో ‘కబాలి’ కోసం పని చేస్తున్న లోకల్ విలన్ తో కలిసి ఓ సెల్ఫీ దిగాడు రజినీ. ఆ ఫొటో ఇప్పుడు సోషల్ మీడియాలో హల్ చల్ చేస్తోంది. ఈ కొత్త గెటప్ లోనూ చాలా స్టైలిష్ గానే ఉన్నాడు రజినీ. ‘కబాలి’ షూటింగ్ 70 శాతం దాకా పూర్తయింది. ప్రస్తుత ఫైనల్ షెడ్యూల్ తో సినిమా మొత్తం పూర్తవుతుంది. ఆ తర్వాత తన ఫోకస్ అంతా రోబో-2 మీద పెడతాడు రజినీకాంత్. ఏప్రిల్ 14న తమిళ సంవత్సరాది సందర్భంగా ఈ చిత్రాన్ని విడుదల చేయాలని ప్లాన్ చేస్తున్నారు. బాలీవుడ్ నటి రాధికా ఆప్టే కథానాయికగా నటిస్తున్న ఈ చిత్రాన్ని యువ దర్శకుడు పా.రంజిత్ డైరెక్ట్ చేస్తున్నాడు. తెలుగులో ఈ చిత్రానికి ‘మహాదేవ్’ అని టైటిల్ అనుకుంటున్నట్లు సమాచారం.