సూపర్ స్టార్ సింపుల్ గా ఎందుకుంటారంటే..

సూపర్ స్టార్ రజనీకాంత్.. పరిచయం అక్కర్లేని పేరు. ఇండియా మొత్తంమీద విపరీతమైన అభిమానులున్న నటుడు. ఏడు పదుల వయస్సులోనూ భారత దేశంలోనే అత్యధిక బడ్జెట్ తో సినిమా చేస్తున్న సినిమాలో హీరో. ఎంత పాపులారిటీ ఉన్నా అంతకు అంత ఒదిగే ఉండటం రజనీకే సొంతం. సినిమాల్లో స్టయిల్ కు ప్రతిరూపంగా కనిపించే ఆయన నిజజీవితంలో చాలా సాదాసీదాగానే కనిపిస్తుంటారు.

క్రియేటివ్ దర్శకుడు శంకర్ డైరెక్షన్ లో రజనీకాంత్ భారీ బడ్జెట్ చిత్రం 2.0 చిత్రం విడుదలకు సిద్ధమవుతోంది. ఈ సందర్భంగా డైరెక్టర్ శంకర్ తో కలిసి రజనీ దుబాయ్ లో మీడియాతో మాట్లాడారు. ఈ సందర్భంగా రజనీని ఓ జర్నలిస్టు ఓ ప్రశ్న అడిగాడు. ‘రజనీ సార్... మీరు ఎందుకింత సింపుల్ అండ్ కామ్ గా ఉంటారు’ అని. దానికి సూపర్ స్టార్ ‘నిజజీవితంలో నటించడానికి నాకెవరూ డబ్బులు ఇవ్వరు కదా. అందుకే సింపుల్ గా ఉంటా’ అంటూ అదిరిపోయే సమాధానం ఇచ్చారు. దాంతో ముసిముసిగా నవ్వడం అందరి వంతయితే.. సైలెంట్ గా కూర్చోవడం ఆ జర్నలిస్టు వంతయింది.

దాదాపు రూ. 400 కోట్ల వ్యయంతో ఇండియాలోనే అత్యంత భారీ బడ్జెట్ చిత్రంగా 2.0ని లైకా ప్రొడక్షన్స్ నిర్మిస్తోంది. ఈ మూవీ తెలుగు - తమిళం - హిందీ భాషల్లో ఒకేసారి విడుదల కానుంది. దీంతోపాటు ప్రపంచ వ్యాప్తంగా 10కిపైగా విదేశీ భాషల్లోకి అనువదించి విడుదల చేయనున్నారు. ఈ మూవీలో బాలీవుడ్ హీరో అక్షయ్ కుమార్ విలన్ గా నటిస్తుండగా బ్రిటిష్ అందం అమీ జాక్సన్ హీరోయిన్ గా నటిస్తోంది.