సూపర్ స్టార్ మతి పోగొట్టేస్తున్నాడంతే..

సూపర్ స్టార్ రజినీకాంత్‌ ను వ్యతిరేకించే వాళ్లల్లో కొందరు ఆయన కలర్ గురించి.. ఫిజిక్ గురించి.. ఆయన ఏజ్ గురించి సెటైర్లు వేస్తుంటారు. సినిమాల్లో రజినీకి మేకప్ వేసి మేనేజ్ చేసేస్తారని.. కలర్ సహా మొత్తం మార్చేస్తారని కూడా అంటుంటారు. ఐతే ‘కబాలి’ సినిమాతో అలాంటి వాళ్లకు నోట మాట రాకుండా చేసేశాడు రజినీకాంత్. నెత్తిన విగ్గు పెట్టడం మినహాయిస్తే ఒరిజినల్ గా ఎలా ఉంటాడో అలాగే కనిపించాడు.

తెల్లటి గడ్డం.. పెద్దగా మేకప్ ఏమీ లేకుండా ఒరిజినల్ అవతారంలోనే కనిపించి మెస్మరైజ్ చేశాడు సూపర్ స్టార్. కబాలి ఫస్ట్ పోస్టర్ వచ్చిన నాటి నుంచి ఈ సినిమా మీద విపరీతమైన క్యూరియాసిటీ మొదలైపోయింది జనాలకు. ఇక గత నెల రిలీజైన టీజర్ కు ఎలాంటి రెస్పాన్స్ వచ్చింది.. సినిమా మీద ఎంత హైప్ నెలకొంది ప్రత్యేకంగా చెప్పాల్సిన పని లేదు. విడుదలకు సమయం కూడా దగ్గర పడుతుండటంతో కొత్త పోస్టర్లతో ప్రమోషన్ డోస్ పెంచడానికి నిర్ణయించుకున్న ‘కబాలి’ టీమ్ కొత్త పోస్టర్లు వదిలింది.

2 కోట్ల వ్యూస్ తో కబాలి టీజర్ ప్రపంచ రికార్డు సృష్టించిన సంగతి గుర్తు చేస్తూ రిలీజ్ చేసిన కొత్త పోస్టర్లో గన్ను పట్టుకుని ఫెరోషియస్ గా ఉన్న రజినీ మరోసారి మెస్మరైజ్ చేశాడు. ఇందులో హీరోయిన్ రాధికా ఆప్టే లుక్ కూడా చాలా బాగుంది. మరో పోస్టర్లో రజినీ ఏదో దీర్ఘంగా ఆలోచిస్తుంటే సైడ్ యాంగిల్లో క్లిక్ కొట్టారు. ఆ లుక్ కూడా అదిరిపోయింది. ఈ పోస్టర్ తెలుగు ప్రేక్షకులకు ఎక్స్ క్లూజివ్ గా రిలీజ్ చేసింది కావడం విశేషం. జూన్ 12న ‘కబాలి’ తమిళ ఆడియో రిలీజవబోతుండగా.. తర్వాత రెండు మూడు రోజులకు తెలుగు ఆడియో విడుదలవుతుంది. జులై 1న ప్రపంచ వ్యాప్తంగా ‘కబాలి’ ప్రేక్షకుల ముందుకొస్తుంది.