జనవరి 10న కోలీవుడ్ సునామి

అదేంటి అని ఆశ్చర్యపోకండి. ఇక్కడ అన్నది సినిమాల గురించి. పొంగల్ ని తమిళ దర్శక నిర్మాతలు ఎంతగా టార్గెట్ చేస్తారో తెలిసిందే. కాకపోతే సాధ్యమైనంత మేరకు స్టార్ క్లాష్ లేకుండా జాగ్రత్త పడతారు. కానీ ఈ సారి మాత్రం భీకర పోరు తప్పేలా లేదు. సూపర్ స్టార్ రజనీకాంత్ పెట్టా అజిత్ విశ్వాసం రెండూ జనవరి 10నే విడుదల కాబోతున్నాయి. ఆ మేరకు నడిగర్ సంఘం కార్యదర్శి విశాల్ కన్ఫర్మేషన్ ఇవ్వడంతో అభిమానులు సంతోషంలో మునిగి తేలుతుండగా బయ్యర్లు మాత్రం తలలు పట్టుకుంటున్నారు.

రజని అజిత్ ఇద్దరికీ అక్కడ ఉన్న మార్కెట్ గురించి చెప్పాల్సిన పని లేదు. క్రేజ్ విషయంలో ఎవరికి ఎవరు తీసిపోరు అనే రేంజ్ లో ఓపెనింగ్స్ సాధిస్తూ ఉంటారు. రజని సీనియారిటీ అజిత్ కు లేకపోయినా యూత్ ఫాలోయింగ్ లో మాత్రం ఓ రెండడుగులు ముందే ఉన్నాడన్నా ఆశ్చర్యం లేదు. అయితే రెండు వేర్వేరు తేదీలు కాకుండా ఒకే రోజు క్లాష్ కు సిద్ధపడటంతో బాక్స్ ఆఫీస్ పోరు రసవత్తరంగా మారనుంది. జనవరి 10 గురువారం అవుతుంది. నాలుగు రోజుల సుదీర్ఘమైన వీక్ ఎండ్ తో పాటు కీలకమైన పండగ సీజన్ కాబట్టి ఇద్దరిలో ఎవరు వెనక్కు తగ్గమని ఖరాఖండిగా నిర్మాతల మండలికి చెప్పడంతో విశాల్ అన్ని చర్చలు చేసాకే ఒకే డేట్ ఇచ్చినట్టు చెన్నై మీడియా సమాచారం.

అయితే థియేటర్ల సంఖ్యతో పాటు కంటెంట్ గురించిన పోలికలతో సోషల్ మీడియా వార్ ఓ రేంజ్ లో జరిగేలా ఉంది. కాకతాళీయంగా పెట్టా-విశ్వాసంలలో రజని అజిత్ లు ఇద్దరూ రెండు విభిన్నమైన గెటప్స్ లో కనిపించనున్నారు. అవి డ్యూయల్ రోల్సా అనే విషయంలో రెండు సినిమాలకు సంబంధించి క్లారిటీ లేదు. మన దగ్గర ఎన్టీఆర్-వినయ విధేయ రామ-ఎఫ్2 ల హంగామా ఉండగా మూడు వేర్వేరు తేదీల్లో వస్తున్నాయి. కానీ కోలీవుడ్ లో మాత్రం ఒకే తేదీకి ఇద్దరు దిగ్గజాలు రావడం అంటే మాటలా. వీటి తెలుగు డబ్బింగ్ వెర్షన్ల విడుదల విషయంలో ఇంకా ఏ నిర్ణయం తీసుకోలేదు