లీకుల జోరు.. పెట్టా టీమ్ బేజారు!

గతంలో హీరోల గెటప్ లు సినిమా రిలీజ్ అయ్యేదాకా.. ఎట్ లీస్ట్ ఫస్ట్ లుక్ పోస్టర్స్ రిలీజ్ చేసేంత వరకూ దాచిపెట్టడం వీలయ్యేది. ఇక రజనీకాంత్ లాంటి హీరోకు ఎలాగూ విగ్గే కాబట్టి.. బయట అయన విగ్ లేకుండా నార్మల్ గా ఉంటాడు కాబట్టి అయన కొత్త సినిమా గెటప్ లు బయటకు వచ్చే ఛాన్సే లేదు. కానీ ఇప్పుడు సోషల్ మీడియా జనరేషన్ లో రజనీ చొక్కా మారిస్తేనే న్యూస్ అవుతుంది.. అలాటిది కొత్త సినిమా కోసం గెటప్ మారిస్తే ఆ లుక్ లీక్ కాకుండా ఉంటుందా?

రజనీ ప్రస్తుతం కార్తిక్ సుబ్బరాజ్ దర్శకత్వంలో 'పెట్టా' అనే చిత్రంలో నటిస్తున్నాడనే సంగతి తెలిసిందే. ఇప్పటికే ఈ సినిమా షూటింగ్ లొకేషన్ నుండి పలు ఫోటోలు లీక్ అయాయి. ఆ ఫోటోలలో రజనీ యంగ్ అండ్ డైనమిక్ లుక్ బయటకు వచ్చింది. ఇక తాజాగా 'పెట్టా' షూటింగ్ లొకేషన్స్ నుండి మరో రెండు ఫోటోలు లీక్ అయ్యాయి. ఒక ఫోటోలో వింటేజ్ స్టైల్లో 'క్షత్రియ పుత్రుడు' కమల్ హాసన్ లా బుర్రమీసం గెటప్ లో ఉన్నాడు. ఇక మరో ఫోటోలో త్రిష ట్రెడిషనల్ గెటప్ లో చీరకట్టుకుని మెట్ల మీద కూర్చుంది.

ఈ ఫోటోలు ఇప్పటికే సోషల్ మీడియాలో జోరుగా హల్చల్ చేస్తున్నాయి. 'పెట్టా' టీమ్ ఎన్ని జాగ్రత్తలు తీసుకుంటున్నా లీకులు మాత్రం ఆగక పోవడంతో 'పెట్టా' టీమ్ వారు తలలు పట్టుకుంటున్నారట. లీకుల సంగతి పక్కన బెడితే.. జెట్ స్పీడ్ తో షూటింగ్ జరుపుకుంటున్న ఈ చిత్రాని వచ్చే ఏడాది సమ్మర్ లోపే ప్రేక్షకుల ముందుకు తీసుకొస్తారట. విజయ్ సేతుపతి.. నవాజుద్దిన్ సిద్దిఖిలు ఈ సినిమాలో ఇతర కీలక పాత్రలలో నటిస్తున్నారు.