ఆ తెలుగు హీరోయిన్‌ రజినీకి ప్రత్యేకమట

సూపర్‌ స్టార్‌ రజినీకాంత్‌ ఇప్పటి వరకు తన కెరీర్‌ లో ఎంతో మంది హీరోయిన్స్‌ తో నటించాడు. ‘రోబో’ చిత్రంలో మాజీ ప్రపంచ సుందరి అయిన ఐశ్వర్య రాయ్‌ తో కూడా నటించాడు. ఎంతో మంది అందగత్తెలతో - ఎంతో ప్రతిభ ఉన్న హీరోయిన్స్‌ - బాలీవుడ్‌ స్టార్‌ హీరోయిన్స్‌ తో నటించినప్పటికి రజినీకాంత్‌ కు ఎంతో నచ్చిన హీరోయిన్‌ ఫటాఫట్‌ జయలక్ష్మినట. తాజాగా ఈ విషయాన్ని స్వయంగా ఆయనే ఒక ఇంటర్వ్యూలో చెప్పుకొచ్చాడు.

తెలుగు సినిమా పరిశ్రమకు చెందిన ఫటాఫట్‌ జయలక్ష్మి అప్పట్లో రజినీకాంత్‌ తో రెండు సినిమాలు చేసింది. తమిళంలో - తెలుగులో పలు చిత్రాల్లో నటించింది. తమిళనాట బాలచందర్‌ చిత్రాల్లో ఎక్కువగా నటించిన అక్కడి వారి అభిమానంను పొందిన జయలక్ష్మి తనకు ఎప్పటికి ప్రత్యేకమైన నటి అని - ఆమె అంటే తనకు ప్రత్యేకమైన అభిమానం అంటూ రజినీకాంత్‌ పేర్కొన్నాడు. ఆమె వ్యక్తిత్వం తనకు బాగా నచ్చేదని - అందుకే తను నా కెరీర్‌ లో బెస్ట్‌ ఫీమేల్‌ కో స్టార్‌ గా నిలిచి పోయిందన్నాడు.

ఎప్పుడో తనతో రెండు సినిమాలు చేసి - పెద్దగా స్టార్‌ డం ను కూడా దక్కించుకోలేక పోయిన ఫటాఫట్‌ జయలక్ష్మిని ఇంకా గుర్తుంచుకుని తన బెస్ట్‌ ఫీమేల్‌ కోస్టార్‌ అంటూ రజినీకాంత్‌ చెప్పడం ఆయన సంస్కారంకు నిదర్శణంగా చెప్పుకోవచ్చు. రజినీకాంత్‌ వంటి సూపర్‌ స్టార్‌ తో బెస్ట్‌ కో స్టార్‌ అనిపించుకున్న జయలక్ష్మి కొన్ని కారణాల వల్ల ఆత్మహత్య చేసుకున్నారు. ఈతరం తెలుగు ప్రేక్షకులు ఫటాఫట్‌ జయలక్ష్మి పేరు కూడా ఎప్పుడు విని ఉండరు. ఇప్పుడు ఆమె పేరు రజినీకాంత్‌ వల్ల మీడియాలో వినిపించడంతో ఆమె గురించి జనాలు మాట్లాడుకోవడంతో పాటు - ఆమె సినిమాల కోసం గూగుల్‌ చేస్తున్నారు.