ఇక్కడ మహేష్.. అక్కడ రజినీకాంత్

మహేష్ బాబు వేరే హీరోల సినిమాల ఫంక్షన్ లకు అతిథిగా రావడం చాలా అరుదు. కానీ అక్కినేని నాగార్జున అడిగేసరికి కాదనలేకపోయాడు. తన లాంచింగ్ కి నాగార్జున వచ్చి ఆశీర్వదించిన సంగతి గుర్తుంచుకుని.. అఖిల్ కోసం ‘అఖిల్’ సినిమా ఆడియో పంక్షన్ కు వచ్చాడు. ఆ వేడుకకు కళ తెచ్చాడు మహేష్. అనుకున్నట్లే ఆడియో ఫంక్షన్ అదిరిపోయింది. ఇప్పుడిక అఖిల్‌ అమెరికాలో తన సినిమాను సొంతంగా ప్రమోట్ చేసుకునే పనిలో పడ్డాడు. అక్కడి నుంచి ఇండియాకు వచ్చాక అఖిల్ ఫోకస్ కోలీవుడ్ పై పడనుంది. ‘అఖిల్’ సినిమాను తెలుగుతో పాటు తమిళంలోనూ భారీ స్థాయిలో విడుదల చేయడానికి సన్నాహాలు జరుగుతున్నాయి.

తెలుగు ఆడియో ఫంక్షన్ కు ‘సూపర్ స్టార్’ను రప్పించిన నాగార్జున.. తమిళంలో కొడుకును పరిచయం చేయడానికీ ‘సూపర్ స్టార్’ సాయమే తీసుకుంటున్నట్లు సమాచారం. ‘అఖిల్’ తమిళ వెర్షన్ ఆడియో ఫంక్షన్ త్వరలోనే చెన్నైలో జరగబోతోంది. రజినీకాంత్ ను ముఖ్య అతిథిగా పిలుస్తున్నట్లు తెలిసింది. ప్రస్తుతం రజినీ ‘కబాలి’ షూటింగులో పాల్గొంటున్నాడు. అక్టోబరు 10 తర్వాత యూనిట్ తో కలిసి మలేషియాకు వెళ్లబోతున్నాడు. ఈ లోపే చెన్నైలో ‘అఖిల్’ ఆడియో ఫంక్షన్ చేయడానికి సన్నాహాలు జరుగుతున్నాయి. ఇప్పటికే సూపర్ స్టార్ నుంచి హామీ తీసుకున్నారట. ‘అఖిల్’ తమిళ వెర్షన్ ను తెలుగు నిర్మాత సి.కళ్యాణ్ విడుదల చేస్తుండటం విశేషం.