రజినీ కళ్లు రీమేక్ పై పడ్డాయా?

సూపర్ స్టార్ రజినీకాంత్ కొన్నేళ్లుగా చాలా సెలెక్టివ్ గా సినిమాలు చేస్తున్నాడు. ఏమాత్రం హడావుడి పడకుండా ఆచితూచి సినిమాలు ఎంచుకుంటున్నాడు. ‘లింగా’ తర్వాత కొత్త సినిమా ‘కబాలి’ మొదలుపెట్టడానికి ఏడెనిమిది నెలలు టైం తీసుకున్నాడు. ఐతే ఈ సినిమా పూర్తయ్యే సమయానికి శంకర్ ‘రోబో-2’తో రెడీ అయిపోవడంతో ఆయన ఇంతకుముందులాగా ఖాళీగా ఉండాల్సిన అవసరం లేకపోయింది. ఈ సినిమా పూర్తవడానికి కనీసం ఏడాదైనా పట్టేలా ఉంది. ఐతే ఈ లోపే రజినీ తర్వాతి సినిమా గురించి ఊహాగానాలు మొదలైపోయాయి. సూపర్ స్టార్ కళ్లు ఓ కన్నడ రీమేక్ మీద పడ్డాయని కోలీవుడ్ లో గుసగుసలు వినిపిస్తున్నాయి.

కన్నడలో ఇటీవలే విడుదలై సూపర్ హిట్ టాక్ తెచ్చుకున్న ‘శివలింగ’ రీమేక్ లో నటించడానికి రజినీ ఆసక్తి చూపిస్తున్నట్లు చెబుతున్నారు. శివరాజ్ కుమార్ హీరోగా నటించిన ఈ సినిమాను పి.వాసు రూపొందించడం విశేషం. ఇంతకుముందు ఆయనే రజినీతో ‘చంద్రముఖి’ లాంటి బ్లాక్ బస్టర్ ఇచ్చారు. ఆ తర్వాత వీళ్లిద్దరి కాంబినేషన్ లో వచ్చిన ‘కథానాయకుడు’ ఫ్లాప్ అయినప్పటికీ పి.వాసు మీద రజినీకి బాగానే గురి ఉంది. ‘చంద్రముఖి’ తరహాలోనే ‘శివలింగ’ కూడా హార్రర్ నేపథ్యమున్న సినిమా. వైవిధ్యమైన కథతో తెరకెక్కిన ఈ చిత్రాన్ని రజినీ ఇమేజ్ కు తగ్గట్లు తమిళంలో తీయడం కోసం పి.వాసు ప్రయత్నిస్తున్నారట. ఇంకా ఏమీ ఫైనలైజ్ కాకపోయినప్పటికీ ప్రస్తుతానికి చర్చలు మాత్రం నడుస్తున్నాయి.