అసలు రజనీ సార్ ను ఏమనాలి?

సౌతిండియా సూపర్ స్టార్ రజినీకాంత్ కు ఇండస్ట్రీలో చాలా మంచి పేరుంది. ఏమాత్రం ఆడంబరాలు లేకుండా.. చాలా అంటే చాలా సింపుల్ గా బతికేస్తారని.. మంచి మనిషి అని.. కష్టాన్ని గుర్తించే వ్యక్తి అని.. భేషజాలు లేని మహా మనీషి అని.. ఇలా ఉంటాయి రజినీకాంత్ గురించి మీడియా రాసే మాటలు. ఇండస్ట్రీలో అలాంటి సూపర్ స్టార్ ని చూడలేమని చాలామందే చెబుతుంటారు. వీటన్నిటికి తోడు ఆయన దైవచింతన.. మరో పది మెట్లు ఎక్కించేస్తుంది.

ఇవన్నీ నిజమే అయినా.. రజినీకాంత్ ఎంచుకుంటున్న సినిమాలు చూసి.. ఆయన్ని డబ్బు మనిషి అంటున్నారు చాలామంది. సూపర్ స్టార్ కు భారీ పేమెంట్స్ చేతికొచ్చే సినిమాలు తప్ప.. సమాజానికి మంచి చెప్పే టైపులో ఒక్కటంటే ఒక్కటి ఆయన సినిమా చేయరు. బడా ప్రొడ్యూసర్లు తప్ప మిగిలినవారెవరూ రజినీతో సినిమా చేయాలని ఊహించుకోవడం కూడా జరగని పని అన్నది వారి వాదన. వీటన్నిటికి మించి ఇప్పుడు పా రంజిత్ తో సినిమా చేసేందుకు రజినీకాంత్ అంగీకరించడం చాలామందికి ఆశ్చర్యాన్ని కలిగిస్తోంది.

ముందే క్రియేట్ చేసిన ఆర్టిఫిషియల్ హైప్ తో.. చెప్పుకోదగిన స్థాయిలోనే కబాలికి డబ్బులు వచ్చాయి. అయితే.. సినిమా చాలామందిని ముంచేసింది. ముఖ్యంగా అభిమానులను నిరుత్సాహానికి గురి చేసింది. అయినా సరే.. మళ్లీ అదే దర్శకుడితో.. అల్లుడు ధనుష్ నిర్మాతగా సినిమాను అనౌన్స్ చేశారు. కబాలిని కంప్లీట్ చేసినట్లే.. దీన్ని కూడా 15-20 కోట్ల లోపే పూర్తి చేసేయాలని.. కబాలి టైపులోనే ఆడియన్స్ ను అట్రాక్ట్ చేసేలా కంటెంట్ ఉండేలా చూసుకుంటున్నారట. ఇదంతా చూస్తే.. రజనీ సార్ ను ఏమనాలి?