100 కోట్ల బడ్జెట్ తో పాన్ ఇండియా మూవీగా 'రాక్షసుడు 2'

బెల్లంకొండ శ్రీనివాస్ - రమేష్ వర్మ కాంబినేషన్ లో 'రాక్షసుడు' వంటి బ్లాక్ బస్టర్ చిత్రాన్ని నిర్మించారు ప్రముఖ నిర్మాత కోనేరు సత్యనారాయణ. ప్రస్తుతం మాస్ మహారాజా రవితేజ హీరోగా రమేష్ వర్మ దర్శకత్వంలో 'ఖిలాడి' చిత్రాన్ని నిర్మిస్తున్నారు. ఈ క్రమంలో ఇటీవలే రమేష్ వర్మతో ''రాక్షసుడు 2'' సినిమాని ప్రకటించారు. 'హోల్డ్‌ యువర్‌ బ్రీత్' అంటూ అనౌన్స్మెంట్ పోస్టర్ తో ఆసక్తిని కలిగించిన మేకర్స్.. ఇందులో హీరో ఎవరనేది ప్రకటించలేదు. 'రాక్షసుడు' సినిమా రెండేళ్లు పూర్తి చేసుకున్న సందర్భంగా కోనేరు సత్యనారాయణ సెకండ్ పార్ట్ గురించి కొన్ని ఆసక్తికరమైన వివరాలను వెల్లడించారు.

"రాక్షసుడు 2'' కథ మొదటి భాగం కంటే చాలా ఎగ్జైటింగ్ గా ఉంటుంది. అంతేకాదు పార్ట్-1 కంటే ఎక్కువ కమర్షియల్ ఎలిమెంట్స్ ఉంటూ మరింత థ్రిల్లింగ్ గా ఉండబోతోంది అని నిర్మాత సత్యనారాయణ అన్నారు. ''రాక్షసుడు-2 హాలీవుడ్ సినిమాతో సమానంగా ఉంటుంది. ఇది పాన్ ఇండియా స్థాయిలో రూపొందుతుంది. దీని కోసం 100 కోట్ల బడ్జెట్‌ ను కేటాయించాము. ఈ సినిమా పూర్తిగా లండన్‌ లో చిత్రీకరించబడుతుంది. ఒక స్టార్ హీరో ఇందులో లీడ్ రోల్ పోషిస్తున్నారు. సరైన సమయంలో హీరో పేరును ప్రకటిస్తాము'' అని వెల్లడించారు.

బాలీవుడ్‌ లో 'రాక్షసుడు' చిత్రాన్ని రీమేక్ చేయాలన్న కోనేరు సత్యనారాయణ ప్లాన్ కు కోవిడ్ వచ్చి బ్రేక్స్ వేసింది. దీని గురించి ఆయన మాట్లాడుతూ.. "పూజా ఫిలిమ్స్ కు 'రాక్షసుడు' సినిమా రైట్స్ ఇవ్వమని హీరో అక్షయ్ కుమార్ మమ్మల్ని సంప్రదించాడు. అతను ఆ పాత్రకు సరిగ్గా సరిపోతాడని భావించి మేము వెంటనే హక్కులను ఇచ్చేసాము. డైరెక్టర్ రమేష్ వర్మ ఈ సినిమాతో బాలీవుడ్‌ లో అరంగేట్రం చేస్తున్నాడు" అని చెప్పారు. ఇంకా 'ఖిలాడీ' గురించి చెబుతూ.. "మా బ్యానర్ లో ఇది మరొక బ్లాక్ బస్టర్ అవుతుంది. సినిమా రైట్స్ కోసం బాలీవుడ్ స్టార్ హీరోలు కొంతమంది ఇప్పటికే మమ్మల్ని సంప్రదిస్తున్నారు. దీనిపై మేము త్వరలో ఓ నిర్ణయం తీసుకోవాల్సి ఉంది" అని చెప్పాడు.

ఈ సందర్భంగా కోనేరు సత్యనారాయణ తన కుమారుడు హవీష్‌ తో ఒక బిగ్ ప్రాజెక్ట్ చేయబోతున్నట్లు హింట్ ఇచ్చారు. "రాబోయే రోజుల్లో మీరు హవిష్ నుండి బెస్ట్ మూవీస్ ని చూడబోతున్నారు. ఏదో ఒక రోజు అతను పెద్ద స్టార్ అవుతాడని నేను గట్టిగా నమ్ముతున్నాను" అని నిర్మాత ధీమా వ్యక్తం చేశారు. ఇకపోతే రమేష్ వర్మ ప్రస్తుతం 'ఖిలాడి' సినిమా పనుల్లో బిజీగా ఉన్నారు. ఈ చిత్రానికి సంబంధించిన పోస్ట్‌ ప్రొడక్షన్‌ కార్యక్రమాలు పూర్తైన తర్వాత ''రాక్షసుడు 2'' సినిమా ప్రారంభం కానుంది. 'రాక్షసుడు' చిత్రం కోసం పని చేసిన సాంకేతిక బృందం అంతా 'రాక్షసుడు 2' లో భాగం అవుతున్నారు.

ఎ స్టూడియోస్‌ సమర్పణలో హవిష్ ప్రొడక్షన్‌ బ్యానర్ పై 'రాక్షసుడు 2' రూపొందనుంది. గిబ్రాన్ ఈ చిత్రానికి సంగీతం సమకూరుస్తున్నారు. వెంకట్ సి దిలీప్ ఈ సినిమాకి సినిమాటోగ్రఫీ అందించనున్నారు. మ్యూజిక్ డైరెక్టర్ దేవి శ్రీ ప్రసాద్ తమ్ముడు సాగర్ మరియు శ్రీకాంత్ విస్సా కలిసి ఈ చిత్రానికి సంభాషణలు రాస్తున్నారు. ఫైట్ మాస్టర్స్ ద్వయం రామ్ - లక్ష్మణ్ యాక్షన్ కొరియోగ్రఫీ చేయనున్నారు. 'రాక్షసుడు' చిత్రాన్ని తమిళ సినిమా ఆధారంగా తెరకెక్కించిన దర్శకుడు రమేష్ వర్మ.. ఈ సీక్వెల్ కోసం కథ - స్క్రీన్ ప్లే రాసుకున్నారు. పాన్ ఇండియా స్థాయిలో 100 కోట్ల2 బడ్జెట్ తో స్టార్ హీరోతో రూపొందించే 'రాక్షసుడు' సినిమా ఎలాంటి సెన్సేషన్ క్రియేట్ చేస్తుందో చూడాలి.