స్టార్ హీరోతో 'రాక్షసుడు 2'.. టైటిల్ పోస్టర్ విడుదల..!

బెల్లంకొండ సాయి శ్రీనివాస్ హీరోగా 'రాక్షసుడు' అనే క్రైమ్ థ్రిల్లర్ సినిమా రూపొందించి సూపర్ హిట్ అందుకున్నాడు దర్శకుడు రమేష్ వర్మ. ప్రస్తుతం మాస్ మహారాజా రవితేజ హీరోగా 'ఖిలాడి' అనే యాక్షన్ ఎంటర్టైనర్ చిత్రానికి దర్శకత్వం వహిస్తున్నారు. ఈ సినిమా ప్రేక్షకుల ముందుకు రాకముందే మరో ప్రాజెక్ట్ ని ప్రకటించి టైటిల్ పోస్టర్ రిలీజ్ చేశారు రమేష్ వర్మ. 'రాక్షసుడు' చిత్రానికి సీక్వెల్ గా ''రాక్షసుడు 2'' అనే క్రైమ్ థ్రిల్లర్ ను తెరకెక్కించనున్నట్లు మేకర్స్ అధికారికంగా వెల్లడించారు. 'హోల్డ్ యువర్ బ్రీత్' అనే ట్యాగ్‌ లైన్‌ తో ఈ సినిమా వస్తుంది. టైటిల్ పోస్టర్‌ లో ఒక సైకో కిల్లర్ చేతిలో గొడ్డలిని పట్టుకొని.. తన భుజంపై ఒక మృత దేహాన్ని మోసుకెళ్ళడం చూడవచ్చు. అలానే రక్తం కారుతున్న మాసం కొట్టే కత్తిని గొలుసుతో వేలాడదీయడం కనిపిస్తోంది. ఇక 'రాక్షసుడు' చిత్రంలోని బొమ్మ తల ఉండేలా టైటిల్ ను డిజైన్ చేశారు. 'రాక్షసుడు 2' చిత్రం భిన్నమైన సెటప్‌ తో మైండ్ బ్లోయింగ్ థ్రిల్లర్‌ గా ఉండబోతోందని చిత్ర యూనిట్ తెలిపింది. టైటిల్ మరియు ట్యాగ్‌ లైన్‌ కు బట్టి చూస్తే ఇది 'రాక్షసుడు' సినిమా కంటే థ్రిల్లింగ్ గా మరింత భయానకంగా ఉంటుందని తెలుస్తోంది. ఈ సీక్వెల్ చిత్రంలో ఒక స్టార్ హీరో నటించనున్నారని.. త్వరలోనే ఆ హీరో ఎవరనేది ప్రకటిస్తామని మేకర్స్ పేర్కొన్నారు. ఈ సినిమా షూటింగ్ త్వరలో ప్రారంభమవుతుంది. 'రాక్షసుడు' చిత్రం కోసం పని చేసిన సాంకేతిక బృందం మొత్తం 'రాక్షసుడు 2' లో భాగం అవుతున్నారు. ఎ స్టూడియోస్‌ సమర్పణలో హవిష్ ప్రొడక్షన్‌ బ్యానర్ పై సత్యనారాయణ కోనేరు ఈ చిత్రాన్ని నిర్మిస్తున్నారు. గిబ్రాన్ సంగీతం సమకూరుస్తుండగా.. వెంకట్ సి దిలీప్ సినిమాటోగ్రఫీ అందించనున్నారు. రాక్‌ స్టార్ దేవి శ్రీ ప్రసాద్ సోదరుడు సాగర్ మరియు శ్రీకాంత్ విస్సా ఈ చిత్రానికి సంభాషణలు రాస్తున్నారు. ఫైట్ మాస్టర్స్ రామ్-లక్ష్మణ్ యాక్షన్ సీక్వెన్స్ లను డిజైన్ చేయనున్నారు. దర్శకుడు రమేష్ వర్మ ఈ చిత్రానికి కథ - స్క్రీన్ ప్లే అందిస్తున్నారు.