‘ఖాకి’ జోడీ మళ్లీ జంటగా..

టాలీవుడ్ స్టార్ హీరోయిన్ రకుల్ ప్రీత్‌ సింగ్ కు ఏడాది కాలంగా అంతగా కలిసి రాలేదు. ఎన్నో ఆశలు పెట్టుకున్న ‘స్పైడర్’ తీవ్ర నిరాశకు గురి చేస్తే.. ‘విన్నర్’ కూడా తుస్సుమనిపించింది. లేటెస్టుగా రకుల్ బాలీవుడ్ మూవీ ‘అయ్యారీ’ కూడా అట్టర్ ఫ్లాప్ అయింది. ఐతే ఈ ఏడాది కాలంలో రకుల్‌ కు కొంచెం సంతోషాన్నిచ్చిన ఏకైక సినిమా ‘ఖాకి’. ఈ ద్విభాషా చిత్రం రెండు చోట్లా మంచి ఫలితాన్నందుకుంది. రకుల్ పాత్ర విషయంలో నెగెటివ్ ఫీడ్ బ్యాక్ వచ్చినప్పటికీ ఆమె ఖాతాలో ఒక విజయమైతే పడింది. కార్తితో ఆమెది హిట్ పెయిర్ అన్న పేరొచ్చింది. అందుకే ఇప్పుడు అదే హీరో సరసన మరో అవకాశం దక్కించుకుంది రకుల్. ఇది చాలా పెద్ద ప్రాజెక్టే కావడం విశేషం.

రజత్ రవిశంకర్ అనే కొత్త దర్శకుడు రూపొందించనున్న ఈ చిత్రాన్ని రిలయన్స్ ఎంటర్టైన్మెంట్ సంస్థ భారీ బడ్జెట్ లో తెరకెక్కించనుంది. హ్యారిస్ జైరాజ్ సంగీతాన్నందించనున్నాడు. ప్రకాష్ రాజ్.. రమ్యకృష్ణ.. కార్తీక్ లాంటి ప్రముఖ తారాగణం ఈ చిత్రంలో నటించనుంది. వరుస ఫ్లాపుల నేపథ్యంలో రకుల్ కు కొంత కాలంగా అవకాశాలు ఆగిపోయాయి. కొన్ని సినిమాలకు ఆమెను అనుకుని ఆ తర్వాత తప్పించడం చర్చనీయాంశమైంది. ఇలాంటి సమయంలో కార్తి సరసన ఓ క్రేజీ ప్రాజెక్టులో అవకాశం దక్కడం రకుల్ కు సంతోషాన్నిచ్చేదే. ఈ చిత్రం ఈ ఏడాది చివర్లో ప్రేక్షకుల ముందుకొస్తుంది.