కొత్త డీజేకు అందగత్తె ఆశీర్వాదం

రీసెంట్ గా అబుదాబిలో సైమా అవార్డుల వేడుక జరిగిన సంగతి తెలిసిందే. టాలీవుడ్ హీరో అల్లు శిరీష్ ఈ కార్యక్రమంలో వ్యాఖ్యాతగా వ్యవహరించి మెప్పించాడు. తన సోదరుడు అల్లు అర్జున్ లేటెస్ట్ మూవీ డీజే గెటప్ లో.. దువ్వాడ జగన్నాధ శాస్త్రిగా కనిపించిన అల్లు శిరీష్.. మంచు లక్ష్మితో ఈ కార్యక్రమాన్ని హోస్ట్ చేశాడు.

ఈ వేడుకలో అల్లు శిరీష్ యాంకరింగ్ హాట్ టాపిక్ అయిపోయింది. మరి ఇంత గొప్పగా.. అందరూ మెచ్చుకునే రీతిలో తను ఆ ఫంక్షన్ లో యాంకరింగ్ చేయడానికి కారణం ఏంటో చెప్పేశాడు అల్లు శిరీష్ అలియాస్ దువ్వాడ జగన్నాథ శాస్త్రి. ఈ కార్యక్రమం ప్రారంభించే ముందు టాలీవుడ్ బ్యూటీ రకుల్ ప్రీత్ సింగ్ ఆశీర్వాదాలు తీసుకున్నాడట. అందుకు సంబంధించిన ఫోటో కూడా ఒకటి నెట్ లో పెట్టాడు శిరీష్. ఇందులో డీజేగా కనిపిస్తున్న అల్లు శిరీష్.. విబూధి రేఖలతో పాటు.. ఎంతో వినయంగా వంగి మరీ నమస్కారం చేస్తుంటే.. పక్కనే ఉన్న రకుల్ ప్రీత్ సింగ్ ఎడం చేత్తో ఆశీర్వాదించేస్తోంది.

స్టేజ్ పై అల్లు కుర్రాడి హంగామా అందరూ చూశారు కానీ.. అంతకు ముందు కూడా ఇలాంటి సందడి చాలానే చేశాడట. వాటిలో ఈ పిక్ కూడా ఒకటి. ఈ ఫోటోను ట్విట్టర్ లో షేర్ చేసిన అల్లు శిరీష్.. 'నా గురువు రకుల్ ప్రీత్ సింగ్ ఆశీర్వాదాలు తీసుకోవడంతోనే సైమా అవార్డ్ ఫంక్షన్ లో డీజేగా మెప్పించగలిగాను' అంటూ చెప్పుకొచ్చాడు.

Like Us on Facebook : https://www.facebook.com/Tupakidotcom/