రకుల్ మరో గోల్డెన్ ఛాన్స్ పట్టేసిందా?

చూస్తుండగానే చకచకా మెట్లు ఎక్కేసి.. స్టార్ హీరోయిన్ అయిపోయింది రకుల్ ప్రీత్ సింగ్. ప్రస్తుతం ఆమె రామ్ చరణ్.. మహేష్ బాబు లాంటి స్టార్ హీరోలతో నటిస్తోంది. తమిళంలో విశాల్ సరసనా అవకాశం దక్కించుకుంది. ఈ ఊపులో మరో బడా తమిళ ప్రాజెక్టులో రకుల్ కు అవకాశం దక్కినట్లు సమాచారం. విలక్షణ నటుడు విక్రమ్ సరసన రకుల్ కథానాయికగా నటించబోతోందట. ఇటీవలే ‘ఇంకొక్కడు’గా పలకరించిన విక్రమ్.. త్వరలోనే హరి దర్శకత్వంలో ‘సామి’ సీక్వెల్ చేయబోతున్నాడు. ఈ సినిమా కోసం రకుల్ ప్రీత్‌ ను హీరోయిన్‌ గా పరిశీలిస్తున్నారట.

విక్రమ్ కెరీర్లోనే అతి పెద్ద హిట్ ‘సామి’నే. అప్పట్లో ఈ సినిమా రజినీకాంత్ ‘నరసింహా’ కలెక్షన్ల రికార్డును బద్దలు కొట్టి తమిళనాట సంచలనం సృష్టించింది. ఈ చిత్రాన్ని తెలుగులో ‘లక్ష్మీ నరసింహ’ పేరుతో రీమేక్ చేశారు. మరిన్ని భాషల్లోకి వెళ్లిందీ సినిమా. ఆ తర్వాత విక్రమ్ చాలా వరకు ప్రయోగాత్మక చిత్రాలే చేశాడు. వాటి వల్ల చాలా ఎదురు దెబ్బలు తిన్నాడు. ఐతే అతను మళ్లీ మాస్ మసాలా సినిమా చేయాలని సంకల్పించాడు. ప్రస్తుతం సూర్యతో ‘సింగం-3’ చేస్తున్న హరి.. వచ్చే నెలలోనే ఫ్రీ అయిపోతాడు. వెంటనే విక్రమ్ తో సామి సీక్వెల్ మొదలు పెట్టనున్నాడు. ఆల్రెడీ స్క్రిప్టు కూడా రెడీ అయిపోయిందట. మరి ఈ సినిమాలో రకుల్ కు నిజంగానే అవకాశం దక్కుతుందేమో చూద్దాం.

Like Us on Facebook : https://www.facebook.com/Tupakidotcom/