రకుల్ సూపర్ స్టార్ అయిపోయేట్లుందే..

రకుల్ ప్రీత్ సింగ్ తొలి తెలుగు సినిమా ‘కెరటం’ అని చాలామందికి తెలియదు. ఆ సినిమా విడుదలైన సంగతి కూడా చాలామందికి తెలియదు. ఆ తర్వాత ఆమెకు ఫస్ట్ బ్రేక్ ఇచ్చిన ‘వెంకటాద్రి ఎక్స్ ప్రెస్’ కూడా చిన్న సినిమానే. అలాంటి నేపథ్యం నుంచి వచ్చిన అమ్మాయి.. స్టార్ హీరోల సరసన వరుసగా సినిమాలు చేస్తుందని ఎవ్వరూ అనుకోలేదు. తెలుగులో హీరోయిన్ల కొరత పెరిగిపోతున్న టైంలో రావడం రకుల్ కు బాగా కలిసొచ్చింది. ఇప్పుడు పోటీలో ఉన్న కొందరు స్టార్ హీరోయిన్ల జోరు క్రమ క్రమంగా తగ్గిపోతుండటం.. డిమాండ్ ఉన్న వేరే హీరోయిన్లు తీరిక లేకుండా ఉండటం రకుల్ కు మరింతగా కలిసొస్తోంది.

ఓ పక్క కాజల్ అగర్వాల్ ప్రభ క్రమక్రమంగా తగ్గిపోతోంది. వరుసగా రెండు డిజాస్టర్లు ఇవ్వడం కూడా ఆమెను దెబ్బ తీసింది. ఇక చందమామకు స్టార్ హీరోల సరసన ఛాన్స్ దక్కడం కష్టం లాగే ఉంది. మరోవైపు సమంత దాదాపుగా సినిమాలకు గుడ్ బై చెప్పేసేలాగా ఉంది. తమన్నా వేరే ప్రాజెక్టులతో బిజీగా ఉంది. దీంతో రకుల్‌ కు వరుసగా బంపర్ ఆఫర్లు తగులుతున్నాయి. ఆల్రెడీ ఎన్టీఆర్ సరసన నటించింది. రామ్ చరణ్‌ తో రెండో సినిమా చేస్తోంది. ఇప్పుడు మహేష్ బాబు సరసన కూడా ఛాన్స్ పట్టేసింది. మిగతా స్టార్ హీరోలందరికీ కూడా రకుల్ మంచి ఛాయిస్‌ లాగా కనిపిస్తోంది. మిగతా స్టార్ హీరోయిన్లతో పోలిస్తే పారితోషకం తక్కువ కావడం.. పైగా చాలా సపోర్టివ్ కావడం వల్ల రకుల్ రోజు రోజుకూ బిజీ అయిపోతోంది. మొత్తానికి ప్రస్తుతం టాలీవుడ్లో అత్యంత క్రేజున్న ప్రాజెక్టుల్లో నటిస్తూ హీరోయిన్లలో సూపర్ స్టార్ అనిపించుకుంటోంది రకుల్.